Danskit tusagassiuuteqarfii
Siumup ataatsimeersuarnera danskit aviisiannit qanimut malinnaavigineqarpoq
Nunatsinni partii annersaata ataatsimeersuarnera Danmarkimi aviisit annersaasa maluginiarsimavaat. Sammineqarneralu aprilip qaammataani kommuninut qinersinermit annertunerujussuuvoq.
Vittus Qujaukitsoq, Kim Kielsenip siulittaasuuffianut unammillertuusoq Sermitsiaq.AG-mit apeqqarissaarfigineqarnermini oqaatigisimasaa, Nunarput bloktilskudeqanngikkaluartoq akissaqarneranik oqaaseqaataa ilaatigut Informationimit, Politikenimit aamma Jyllands-Postenimi pingaarnertut ilanngutassiarineqarpoq.
Aamma atuaruk: Vittus: Bloktilskudeqanngikkaluartoq akissaqarpugut
Nunanut allanut tunngassutilinnut Naalakkersuisuusimasoq partiimi pissaanermik tigusissangaluarpat, aviisinit pingaarnertut ilanngutassiarineqarpoq.
Jylland-Postenip sisamanngornermi, siulittaasunngorniuunnerup Sisimiuni pileruttorfiani, pingaarnertut allaaserisartik qulequtsersimavaat: Kalaallit Nunaani oqqanneq
Annertuunik kinguneqartussaq
- Kalaallit Nunaani partii Siumut socialdemokratiskiusoq Sisimiuni ataatsimeersuarnerani, sisamanngornermi oqqattoqalerpat, Kalaallit Nunaanut aamma Danmarkimut annertuunik kinguneqariaannaasoq, JP-mi pingaarnertut allaaserinnittoq allappoq.
Vittus Qujaukitsup namminiilivinnissap sukkanerusumik ingerlatsiniarnera bloktilskudimilli pisartangaqanngikkaluarluni sapinngikkipput ima oqaasertalerlugu "inuuniarnikkut atungarisat ajornerulissapput, kisianni kaannavianngilagut" pingaarnertut allaaserinnittup ima qisuariaateqarfigaa:
Oqaatsit ingasattajaartut
- Politikkeri, Aleqa Hammondip siuttuunerata nalaani Aningaasaqarnermut Naalakkersuisuusimasup nammineerluni Kalaallit Nunaata karsiata atungarliortumik ilisimaarinnittup oqaasii ingasattajaarput. Oqaasiisigut imminut ilisimanerusorinera assut malunnarpoq, nalunaarusiarpassuarnimi ilisimassavaa Kalaallit Nunaata aningaasarsiorniarnikkut unammilligassarpassuaqartoq. 2016-mut nalunaarusiami Aningaasaqarnermut Naalakkersuisoqarfiup paasivaa, Kalaallit Nunaat annertuunik unammilligassarpassuaqalerumaartoq. Siullertut inuiaqatigiit; inuiaqatigiit ikiliartussapput, inuusutulli ikinnerusut utoqqarnut amerlanerusunut pilersuisunngortussaapput. Aappaattut isertitassat qulakkeerniarneqartussaapput; aatsitassalerineq takornarialerinerluunniit ilimagisamit ineriartunnginnerusimapput.
JP-mi pingaarnertut allaaserinnittoq naggasiilluni allappoq:
- Siumumi ilaasortat pingaaruteqarluinnartumik siulittaasunngorniunnermut peqataapput.
Atuaruk: JP pingaarnertut allaaserisaa tamakkiisoq