Qulaarneqartut
Siumumi politikerip nuimasup piginneqataaffigisaa akileraarutinut akiitsoqartoq
Piginneqatigiiffik KNT, Kalaallit Nunaanni Tunisassiorfik, Niaqornani 2010-mi ilaatigut Karl-Kristian Krusemit aamma Mikael Petersenimit, aallartitseqataaffigineqartoq Akileraartarnermut Aqutsisoqarfimmuinnaq 1,2 millioner koruuninik akiitsoqarpoq
Tunitsivik KNT, Kalaallit Nunaanni Tunisassiorfik, ilaatigut Niaqornani tunitsiviuteqartoq, akileraarutinut A-nut akiliisitsisarsimagaluarluni Akileraartarfimmut Aqutsisoqarfimmut akiliutigineqartunik ingerlatitseqqiineq ajorsimavoq.
Taama Nuuk TV pingasunngornermi saqqummiussaqarpoq.
Piginneqatigiiffik ilaatigut Siumumi politikerimit nuimasumit, aalisarnermut, piniarnermut nunalerinermullu naalakkersuisumit, Karl-Kristian Krusemut kiisalu Siumup aaqqissuussaanikkut siulittaasuata tullianit, Mikael Petersenimit 2010-mi aallartitseqataaffigineqarpoq.
Nuuk TV-mit saqqummiunneqartut najoqqutaralugit suliffeqarfiup KNT-ip isertitanut akileraartarnermut inatsit malillugu tunisisut akileraarutaat Akileraartarnermut Aqutsisoqarfimmut nalunaarutigisarsimanngilai.
Danmarkimi suliffeqarfitt qitiusumik nalunaarsorneqarfianni paasissutissat Nuuk TV-mit pissarsiarineqarsimasut naapertorlugit Siumup aaqqissuussaanermut siulittaasuata tullia, Mikael Petersen, KNT-imi pisortatut nalunaarsorsimasoq, Karl-Kristian Kruse suli maannamut siulittaasutut nalunaarsoqqavoq, naak taassuma decembarimi nalunaarutigereeraluaraa piginneqatigiiffiup KNT-ip siulersuisuinit tunuarnini.
Ukiunut 2013-imut aamma 2014-imut nalunaarsuutini, Nuuk TV-ip Danmarkimi suliffeqarfitt qitiusumik nalunaarsorneqarfiannit pissarsiarisimasaanit erserpoq KNT ukiumut 2 millioner koruunit aamma 3 millioner koruunit akornanni kaaviaartitsisartoq, kisianni aamma piginneqatigiiffiup akiitsui tamakkiisumik 4,5 millioner koruuniusut, taakkunanngalu amerlanerit piaartumik akiligassaasut.
Akileraarutinut A-nut sulinermut sulinermullu akileraarutinut akiitsut 1,2 millioner koruuniupput.