Skip to main content

Siumumi aqutsisut amerlanerussuteqartut aalajagingerat atorunnaarsikkusuppaat

Siumumi aqutsisut partiip 2017-imi ataatsimeersuarnerani amerlanerussuteqartut aalajangingaannik suil atuutilersitsimanngilaq.

Marlunnik qinigaaffeqarnermut apeqqut partii Siumumi uppernassutsimik innarliinermik kinguneqarsinnaavoq. 

Inatsisartuni kommunalbestyrelsimilu ilaasortaaffeqartarneq taamaatinneqassasoq 2017-imi julimi amerlanerussuteqartunit aalajangerneqarpoq.

Partiimut nuuttartut eqqarsartitsisut

Ukioq manna aprilimi Inatsisartunut qinersinerup kingorna partiiminngaanneersut tallimat marlunnik qinigaaffeqalerput. Taakku ilagaat Mala Høj Kuko, nunatsinni partiit annersaanni eqqarsalersitsisoq.

Mala Høj Kuko Atassut tunuliaqutaralugu 2017-imi aprilimi Kommuneqarfik Sermersuumi kommunalbestyrelsimut qinigaavoq. Siumup ataatsimeersuarnerani aalajangerneq atuukkaluarpat Mala Høj Kukop ilaasortaaffiata aappaa Atassummi ilaasortaasimasumut maanna Demokraatit tunuliaqutaralugit Inatsisartunut ilaasortamut Steen Lyngemut, Siumumiit tunniunneqassangaluarpoq. Taamaalilluni Siumup kommuneqarfiit pingaarnersaanni sunniuteqarsinnaanera annikillisinneqassangaluarluni.

Kommuneqarfiit pingaarnersaanni sunniuteqarsinnaanermik annaaneqarnissaq partiip soqutigisarinngikkaa, partiip allaa Mikael Petersen isumaqarpoq.

Aalajangersakkani aporfik nassaarineqartoq

Taamaammat partiip aalajangersagai atuaqqissaarneqarsimapput, tassanilu aaqqiissutaasinnaasoq nassaarineqarsimavoq.

- Aalajangersakkatsinni allassimavoq, siunissami politikkikkut siunniuteqarsinnaaneq pineqartillugu, aaqqiissutit aalajangersakkanut naapertuutinngikkaluarpataluunniit aaqqiissuteqarsinnaasugut, Mikael Petersen Sermitsiaq.AG-mut nassuiaavoq.

Tassa partiip allattaa naapertorlugu, ataatsimeersuarnermi marlunnik qinigaaffeqartarneq pillugu aalajangiisimaneq suli atuutilersinneqanngilaq. Partiimilu aqutsisut septembarip ingerlanerani, inatsisartut ukiaanerani ataatsimiinnissaat pitinnagu, ataatsimeersuartoqaqqinnissaata tungaanut immikkut akuersissut siulersuisunut akuereqquniarpaat.

- Oqaaseqaat nutaaq siulersuisuunernut saqqummiunneqartussaq suliarileruttorparput, taanna ataatsimeersuarnermi aalajangiunneqarsimangaluartumut taarsiullugu atuutilersinneqassaaq, Mikael Petersen paasissutissiivoq.

Iluarineqannginnissaanik ilimasuttoq

Taassuma oqaatigaa, ilaasortat ukiup ataatsip matuma siorna amerlanerussuteqarlutik aalajangiisut ilaasa akerliunerannik iluarinninngilernerannillu kinguneqarsinnaasoq.

- Nalunngilara partiip immikkoortoqarfiini assigiinngitsuni akerliliinerannik kinguneqassasoq. Politikkili taamaappoq, partiip allattaa “kommunalpolitikkimi pissaanermik annaasaqannginnissartik aalajangiisuusimasoq” erseqqissaatigalugu, oqarpoq.

Allat sisamat marlunnik qinigaaffeqarput, tassani Siumumi ilaasortanit allanit kommunnalbestyrelsimi paarlaasinnaangaluarlutik.Pineqartut tassaapput Laura Taunajik, Jess Svane, Nikkulat Jeremiassen aamma Anders Olsen. Taakku allannguisoqarpat marlunnik akissarsiaqaannassapput.

Sooq amerlanerussuteqartut aalajangiinerannik atorunnaarsitsineq ilaasortamik ataatsimik annaasaqarlusi Mala Høj Kukomut atatillugu taamaallaat atuunnianngila?

- Amerlanerussuteqartut aalajangiisimanerat ersarissumik oqallisigineqarsimanngilaq, nassuerutigisinnaavarali ukiuni arlalinni tamanna partiimi oqallisigineqartarsimammat, Mikael Petersenip sooq politikerit allat sisamat marlunnik qinigaaffeqarnerat akuerineqarsimanera oqaaseqarfigisinnaanagu, nassuiaavoq.

Politikerit misilittagartuut

- Politikerit misilittargartuut pikkorissullu pineqarput, Mikael Petersen, marlunnik qinigaaffillit ilaat ataatsimiinnernut tamanut peqataasinnaannginnerannik kinguneqakkajuttartoq nassuerutigalugu, erseqqissaavoq.

- Ajornartorsiut tamanna aaqqiivigissavarput, Mikael Petersen oqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER