qineqqusaarneq

Siumumeersut borgmesteri pillugu maalaarutaat tunngavissaqanngitsoq

Kommunit Nakkutilliisoqarfiata borgmester Asii Chemnitz Narup suliniummut Siorarsiorfimmut atatillugu maalaaruteqartoqarnera akerlilerpaa

Asii Chemnitz Narup

Siumumeersunit Peter Davidsenimit aamma Ane Egede Mathæussenimit borgmesterimut Asii Chemnitz Narupimut (IA) naammagittaalliutit sakkortupput: Taanna innuttaasunut kommunimilu qinikkanut suliniummut Siorarsiorfimmut tunngatillugu peqquserluttuliorsimanerarneqarpoq.

Oqaatsit taakku sakkortuut marsip naanerani, kommunimut qinersisoqarnerata nalaani atorneqarput. Qineqqusaarnermilu isummat sakkortuut avitseqatigiissutigineqartarnerat nalinginnaasuuvoq.

Maalaarutit tamarmik akerlilerneqartut
Kisianni taakku Siumumeersut iliuuseqaqqipput - borgmesteri Kommunit Nakkutilliisoqarfianut maalaarutigaat. Nakkutilliisoqarfimmiillu akissut maanna takkuppoq, maalaarutigineqartullu tamaasa akerlilerpaat.

Sermitsiaq.AG Kommunit Nakkutilliisoqarfiata akissutaanik takunnippoq, tassanilu maalaarutit ataasiakkaat misissorneqarput.

Peter Davidsen (S) aamma Ane Egede Mathæussen (S) maalaarumminni borgmesteri kommunimi qinikkanut innuttaasuinullu eqqunngitsumik paasissutissiisimanerarpaat.

- Siorarsiorfik suliniut 4-5 mia. koruuninik akeqartoq pilersaarutaasunit ilumuunngitsumik aallartingaatsiareersimasoq, borgmesterip Asii Chemnitz Narupip (IA) kommunimi qinikkanut kommunimilu innuttaasut saqqummiinermini isumaqartilersimavai, maalaarummi tamanna allaqqavoq.

Atuaruk: Unnerluut: Nuummi borgmesterip kikkut tamaasa uukapaatikkai

Kommunalbestyrlsi paasitinneqarsimavoq
Kisianni suliniut annertooq sumut killinnersoq, kommunimi qinikkat nalusimanngikkaat, Kommunit Nakkutilliisoqarfiat inerniliivoq.

- Kommunit aqunneqarnerat pillugu Inatsisartut inatsisaat nr. 22, 18. November 2010-meersoq unioqqutinnagu Kommuneqarfik Sermersooq sulisimavoq, tassami kommunalbestyrelsimi ilaasortat aningaasaqarnermullu ataatsimiititaliaq ataatsimiinnerit suliamullu atatillugu sammisaqartarnerit aqqutigalugit Siorarsiorfimmi suliniumut akuutinneqartarsimammata, paasissutissanillu pisariaqartitanik pissarsisinnaasarsimallutik, nakkutilliisoqarfik allappoq.

Peter Davidsen (S) aamma Ane Mathæussen (S) piffissami tassani Kommuneqarfik Sermersuumi aningaasaqarnermut ataatsimiititaliami ilaasortaapput, suliniummullu suliarinneqataallutik.

Atuaruk: Kommunit Nakkutilliisoqarfiat qaqutigut suliamik aalajangiisarpoq

Innuttaasunik ataatsimiititsinerit
Kommunimilu innuttaasut paasissutissanik pissarsiarisinnaasaminnik pisimapput, Kommunit Nakkutilliisoqarfiat taama isumaqarpoq.

- Kommuneqarfik Sermersuup Siorarsiorfimmi pilersaarut piviusorsiortumik innuttaasunut ilisimatitsissutigisarsimavaa, ilaatigut innuttaasunik ataatsimiititsinermigut, suliniutip suli pilersaarutaannaanerata ilisimatitsissutigineqarnissaa pingaartinneqarmat.

Kommunip suliassaq suliarinnittussarsioqqaarnagu siunnersortimik suliaqartitsisimanerat, Siumumit qinikkat marluk aamma maalaarutigaat. Kisianni aamma tamanna tunngavissaqanngilaq, Kommunit Nakkutilliisoqarfiat isumaqarpoq. Suliat taamaattut suliarinnittussarsiunneqartussaanngimmata.

Powered by Labrador CMS