internet

Siumukkut inuusuttaat: Flatrate illoqarfinni tamani atuutilersinneqarli

Siumup Inuusuttunut Suleqatigiiffiata nunatsinni attaveqariaatsit naligiinnerunissaat kissaatigaat

Demokraatit Inuusuttaannit sapaatip akunnera kingulleq kissaatigineqarpoq Air Greenlandip Royal Arctic Line-llu kisermaassinerat nunatsinni atorunnaarsinneqartariaqartoq. Siumup Inuusuttunut Suleqatigiiffiata (SIS) flatratep nunatsinni tamarmi atuutilerneqarnissaa kissaatigaat.

- Nunatsini pitsaasumik sunniuteqartumillu attaveqaqatigiinnissamut aqqutissiuunneqarnissaq aatsaat taama ukiuni makkunani pisariaqartigilersimavoq, SIS-imi siulittaasup tullia Konrad Boye oqarpoq.

Killeqanngitsumik atuisinnaanerup aaliangersimasumillu akiliisarnerup illoqarfinni pingaarnerni taamaallaat atuutsinneqarnerat inuiaqatigiit akissaatikinnerusut ineriartornissaannut inoqarfinnilu isorliunersut avammullu attaveqarnissaannut killilersuinera Inatsisartuni eqqarsaatigilluarneqartariaqartoq isummersorfigineqartariaqartorlu SIS isumaqarpoq.

- Siunissami nunarput tamakkerlugu sumiikkaluaruttaluunniit ilinniarnissamut ilaqutariittullu ataatsimoornissamut aamma aqqutissat ilagissagaat attaveqaatitigut assigiinnerusumik aqqutissiuussinissaq aaqqiivigineqarsinnaappat pingaartutut tikkuarparput taamalilluni angajoqqaat ilinniariartortitsisartut taama aaqqiisoqarsinnaappat attaveqaataat sukkanerusumik sunniuteqarsinnaassammat.

- Angerlarsimaffinniit sumiiffimmilu ilinniartitaaneq annertusarneqarsinnaanngorlugu inuit sumiiffigisaminni nammineq qanoq iliornissaat annertusarneqarsinnaasoq aammattaaq aqqutissat ilagilissagaat naatsorsuutigineqarsinnaavoq, Konrad Boye SIS sinnerlugu nassuiaavoq.

- Taamaammat Inatsisartut ataatsimoorlusi attaveqaatitigut kisermaassinertut ittunik pitsaanerusumik sunniuteqarnerusumillu inuiaqatigiinnut tamanut innassuteqaateqartariaqarpusi.

Powered by Labrador CMS