Naligiissaarineq

Siumukkormiut: Naligiissaarinissamut siunnersuut unitsilli

Siumut sinnerlugu Kommuneqarfik Sermersuumi kommunalbestyrelsemi ilaasortat naligiissaarinissamut siunnersuutip eqquinerlunnissaa ernummatigaat

Nuummi innuttaasut amerliartornerat pissutigalugu Kommuneqarfik Sermersuup aningaasartuutai amerliartortut, Peter Davidsen oqarpoq

Peter Davidsen aamma Tim Serritzlev Siumut sinnerlugu Kommuneqarfik Sermersuumi kommunalbestyrelsemi ilaasortat parteeqatimik nunamut namminermut aningaasaqarnermullu naalakkersuisup Vittus Qujaukitsup naligiissaarinermut siunnersuutaanut akerliupput. Taakku ernummatigaat Kommuneqarfik Sermersuumi suliffissaaleqinerup annertusinissaa.

Atuaruk: Qeqqata: Vittup saqqummiussaa naammaginngilarput

Kommunet akornanni naligiissaarinissamut siunnersuut nutaaq Naalakkersuisut saqqummiussaat Kommuneqarfik Sermersuup naatsorsuinera malillugu Kommuneqarfik Sermersuup ukiumut 56 millioner koruuninik annaasaqaatigisassavaa.

Atuaruk: Asii: Vittus, ilisimasalittut oqalupputit

Meeqqat inuusuttullu eqqugaassapput
- Suut tamarmimmi unittuussapput. Sulisut ikilissapput, kommunep suliffeqarfiutaai suli sipaarniarfigineqalissapput. Aarleqqutigaara aamma meeqqat inuusuttuaqqat inuusuttullu aamma annertuumik eqqugaaqqinnissaat, tamannalu akuersaarneqarsinnaanngilaq, Tim Serritzlev Siumumeersoq oqarpoq Naalakkersuisullu kajumissaarpai naligiissaarinissamut siunnersuut unitsequllugu.

Peter Davidsen Siumumeersoq aamma naligiissaarinissamut siunnersuummut akerliuvoq tunngavilersuutillu sukumiinerusut piumasaralugit. Naalakkersuisut allannguiniarnerminnut ilaatigut tunngavilersuutigaat namminersorlutik oqartussat suliffeqarfiutaannit akileraarutitigut isertitaqarluartoqarmat aningaasanik Kommuneqarfik Sermersuumiit nuussiniartoqartoq.

- Uani eqqaamaneqartariaqarpoq aamma taakkua innuttaasutut allatulli sullinneqarnissaat Kommuneqarfik Sermersuup akisussaaffigaa, tamannalu akikitsuinnaanngilaq, Peter Davidsen Siumumeersoq oqarpoq.

Naligiissaarinermut aaqqissuusseqqinnissamut siunnersuummut oqaaseqaateqarnissamut aggustip aallaqqaataa Naalakkersuit killiffiliuppaat. Pilersaarutit malillugit nalimmassaarinermut aaqqissuussineq nutaaq pillugu aggustip aqqarnat isumaqatigiissusiortoqareersimassaaq.

Powered by Labrador CMS