nunap atortulersugaanera

Siumukkormiu: Sinersortaat Nanortalimmukartinneqartalerli

Sinersortaat Sarfaq Ittuk Nanortalimmut tikittalernissaa, Inatsisartuni ilaasortap Anders Olsenip (S) neriuutigaa

Her ses kystskibet Sarfaq Ittuk

- Sarfaq Ittuup Nanortalimmut annguttalersinnaanera innuttaasunut iluaqutaasussaanera naatsorsuutigineqarsinnaavoq.

Inatsisartuni ilaasortaq Anders Olsen (S) tusagassiuutinut nalunaarummi oqarpoq, taassuma sinersortaat nunatsinni illoqarfiit kujallersaanut tikittalernissaanik Naalakkersuisut periarfissarsiornissaannik, piumasaqarpoq.

- Angallannikkut kiffartuussinissamik isumaqatigiissut nutaaq siornali pilermalli nunatta kujataani angalaniarnikkut pissutsit ilungersunarnerusumut inissinnikuunerat nalorninaatsumik oqaatigisinnaagunarparput. Nanortalik Qaqortumiit akunnerit tallimat missaannaannik umiarsuarmik taasumannga ungasissusilik isumaga malillugu tikinneqarsinnaasariaqarpoq, pingaartumik ukiassalerneraniit upernarnissaata tungaanut. Innuttaasorpassuillu umiatsiaaqqat atorlugit angalaniartuarnerat navianarsinnaasaqisoq arajutsisimanngilarput, ajoraluartumillu inuup inuuneranik ilaatigut naleqarsinnaasarluni, taanna erseqqissaavoq.

Takornarianut aamma iluaqutaassasoq

Nanortalimmilu innuttasut kisimik iluaqutigissanngikkaat, Anders Olsenip oqaatigaa.

- Sarfaq Ittuup Nanortalimmut annguttalersinnaanera innuttaasunut, inuussutissarsiortunut kiisalu takornarissanut annertuumik iluaqutaasussaanera naatsorsuutigineqarsinnaavoq, taanna tikkuaavoq.

Taamaammat Anders Olsenip neriuutigaa, Nanortalik sinersortaammit tikinneqartalernissaanik Naalakkersuisut periarfissarsiorumaartut.

- Nanortalik nunaqarfittaalu qanittuaniittut ilanngullugit 2000 missaannik innuttalik nunap assingani ilanngunneqartariaqalerpoq, Anders Olsen oqarpoq.

Powered by Labrador CMS