Atassut

Siulittaasuugallartoq: Politikerit misilittagartuut akisussaaffimmit qimaasut

Partiip iluani ajornartorsiutit akisusimapput, Atassummi siulittaasuugallartoq Qulutannguaq Berthelsen oqarpoq

Atassummi siulittaasuugallartoq, Qulutannguaq Berthelsen

Marlunngornermi saqqummiunneqareersutut, Atassutip siulittaasuata Knud Kristiansenip partii qimappaa, Inatsisartuni aamma Qaasuitsup Kommuniani attaviitsutut ingerlaqqilluni.

Partiimi siulittaasup tullia Qulutannguaq Berthelsen 32-nik ukiulik, aamma partiip inuusuttunut immikkoortuani siulittaasup tullia, maanna partiimi siulittaasuugallalerpoq.

Atuaruk: Knud Kristiansen Atassummit anivoq

Ataatsimeersuarneq
Partii ataatsimeersuarnissamut piareersartoq, taanna Sermitsiaq.AG-mut ilisimatitsivoq.

- Ataatsimeersuarneq apriilimi pisussaagaluarpoq, kisianni Knud Kristiansenip partiimit tunuarmat, maanna ataatsimeersuarneq siusinnerusukkut pinissaa sulissutigaarput, taanna oqarpoq.

Ataatsimeersuarnermi siulersuisunik nutaanik siulittaasumillu qinersisoqassaaq.

Atuaruk: Politikkikkut naliliisartoq: Kristiansenip partii kiviartortoq qimappaa

Akisussaaffimmit qimaasut
Qulutannguaq Berthelsenip Knud Kristiansen aamma Steen Lynge isornartorsiorpai. Taakku akisussaaffimminnik qimarratiginnittut isumaqarami.

- Taakku imminnut sullissimapput, partiitullu tamanna pisinnaanngilaq. Knud Kristiansenip ajornartorsiutit aqussinnaasimanngilai, Atassummiillu tunuarnera tamatuminnga pissuteqarpoq, partiimi siulittaasuugallartoq oqarpoq.

Nangipporlu:

- Angallannermut kiffartuussinermut isumaqatigiissutinut atatillugu Knud Kristiansen partiimut tusarnaanngilaq, tassami Qeqertarsuup Tunuani aamma Kujataani ilaasortanit akerliusoqarnikuuvoq. Akisussaaffimminik taanna qimarratiginnilluinnarpoq, Qulutannguaq Berthelsen isornartorsiuivoq.

Atuaruk: Politikerip ataatsip aamma Atassut qimappaa

Inuusuttut periarfissinneqarlik
Partiimi kinguaariit nikinnissaat pisariaqarpoq, taanna erseqqissaavoq.

- Partiitut sinerissami ilaasortatsinnut tusarnaartussaavugut. Ilungersuussagut erseqqissarneqassapput, tamannalu kinguaariit nikinneratigut pissaaq.

- Inuusuttut ilaasortagut pimoorussisorujussuupput, partiitullu inuusuttut periarfissittariaqarigut isumaqarpunga, Qulutannguaq Berthelsen oqarpoq, taassuma siulittaasutut qinigassanngortinniarnerluni oqaatigiumanngilaa.

Powered by Labrador CMS