Demokraatit
Siulittaasutut qinigassanngortitaq ilaquttamini alianartumik eqqugaasoq
Inatsisartunut ilaasortaq Justus Hansen (D), arfininngorpat Demokraatit siulittaasumik taasineranni qineqqusaarfigisamini peqataasinnaanngilaq
Demokraatini aqagu siulittaasumik taasinissamut qinigassanngortittut pingasuusut ilaat peqataassanngilaq.
Justus Hansenip (D) ilaqutaani qaninnerni ataaseq kræfteqalersimavoq, taamaattumillu pilertortumik Danmarkimut angalasariaqalerpoq.
Peqataanianngitsoq
Ukiup qanoq ilinera apeqqutaalluni politikerip Tasiilamit timmisartornissaa sivisusariaqarpoq, siullermik Ittoqqortoormiit, Nuuk kingornalu Kangerlussuaq aqqusaaqqaarlugu.
- Nuna tamakkerlugu ataatsimiinnermi peqataassanngivippunga (videokkulluunniit imaluunniit nipikkut red.). Arfininngorpat aatsaat ualikkut tallimanut Nuummut tikissaanga, Justus Hansen Sermitsiaq.AG-mut oqarpoq.
Assit takukkit: Randi naalakkersuisooqatigiit droninngertaaraat
Politikeri malunnartumik ilaquttami nappaammut eqqugaaneranik sunnerteqqanera malunnarpoq, tamanna pingasunngormat paasisimavaa.
Suli qinigassanngortittoq
Politikerilli anguniagaqarnini attatiinnarpaa, Anda Uldumimut (D) kingoraartiunissani kissaatigigamiuk.
Taamaattumillu sapaatip-akunnerata naanerani siulittaasumik taasinissami qinigassanngortinnini ingerlatiinnarpaa, Randi Vestergaard Evaldsen (D) aamma Poul Hansen (D) assigalugit.
Atuaruk: Qineqqusaartup nutaap suleqatigiinneq aamma tatiginassuseq qineqqusaarutigai
- Peqataannginnerma periarfissakka annikillisissanngikkai neriuppunga. Kisianni nammineq peqataallunga tunngavilersuisinnaagaluaruma ajunnginnerussagaluarpoq, Tumioq oqarpoq, taassuma qineqqusaarnermini oqalugiaatissani allariigaq partiimini nassiussorsimavaa.
Misilittagaqarneq eqqissisimanerlu
Taanna Sermitsiaq.AG-mut nassuiaavoq, siulittaasutut qineqqusaarnermi partiip iluani eqqissisimatitsilernissaq pingaarnertut anguniarpaa, killilersuinermillu millisitsiniarluni.
- Anda Uldumip aninerata kingorna partiimi annertuumik eqqissiviittoqarpoq, tamaallu isigalugu uanga misissorsinnaavara. Soorunalimi tunuliaquttani aaqqiagiinngittoqarsimavoq, tamannalu iluarsiiffigisinnaavara. Ilaasortat katersuulluartissinnaavakka, Justus Hansen oqarpoq, taanna kommunimi Inatsisartunilu ukiuni arlalinni politikeritut misilittagaqarpoq.
Atuaruk: Justus Hansen: Siumut suleqatigilluarpara
Tusarfik alla - Demokraatit tunuliaqutaanneersoq - uunga nittartakkamut uppernarsaavoq, partiimi maannakkorpiaq eqqissiviittoqartoq.
Aaqqiagiinnginneq
- Oqaatigisinnaavara ajunnginnerusumik ingerlanikuulluta, taanna oqarpoq.
Tamatuminnga assigiinngitsunik naliliisoqarpoq, ulloq arlaqanngitsut matuma siorna Rasmus Dalsgaard Andersen, 8. februaari Sermersuup Kitaani najukkami partiimi siulittaasunngortoq, Demokraatit iluanni naammagisimaarinnittoqarnerarlugu oqarpoq.
Atuaruk: Inuusuttuni siulittaasutut tunualersoq: Siumut taamaattumik peqatigaarput
Sermitsiaq.AG-p paasisai naapertorlugit, Anda Uldumi paarlallugu kina partiimi siulittaasunngussanersoq suli nalorninartoqarpoq, inuit pingaarutillit arlaqartut qinigassanngortittunik tikkuartuigamik.
Demokraatini siulittaasumik taasineq Nuummi partiip allaffiani arfininngornermi nalunaaqutaq marlunut pissaaq.
Atuaruk: Justus Hansen: Siumut suleqatigilluarpara