Royal Arctic Line
Siulittaasoq RAL-ip aqutsisuinut tatiginnippoq
Naak atuisut Royal Arctic Linemi pissutsinut kamaatiginnikkaluartut, siulersuisuni siulittaasoq Kuno Fencker pisortanik taarsiinianngilaq.
Mailikkut attaveqaqatigiinnerni AG-ip allagaatinik takunnikkumanikkut pissarsiarisimasaani, RAL-ip inuussutissarsiortut atuisui annertuut akornanni umiarsuaatileqatigiiffiup isornartorsiornissaanut tunuarsimaartoqanngilaq.
Aningaasartuutit amerlanerusut
- Tunngaviusut aaqqiiviginiarsigit, atuisut ilaat taama oqarpoq.
Qajaq Trawlimi pisortaq, Søren Brandt, siulersuisuni siulittaasup taarserneqarnissaa piumasaraa. Suliffeqarfik ukiumut 200.000-300.000 koruuninik aningaasartuuteqarnerulersimasoq, Søren Brandt nassuiaavoq, umiarsualivittoqqami containerinik immerneqarsimasunik aallerumajunnaarsimanera pissutigalugu.
- Pisortamut saaffiginnissimagaluarpugut, siulersuisullu siulittaasuat aggersarsimallugu. Kisianni taassuma suliassatigut ajornartorsiutigilersimasavut aamma paasisinnaanngilai. Umiarsualivik nutaaq ammarmalli suut tamarmik annertuumik ajorseriaateqarsimapput ingammik kilisaatinik usingiaanermut atatillugu, Søren Brandt AG-mut oqarpoq.
Pinngitsoorneqarsinnaanngitsoq
RAL-ip siulersuisuinut siulittaasoq Kuno Fencker soraarsitsinissamik piumasaqaatinut oqaasissaqannginnerarpoq. Ukioq kingulleq nalinginnaanngitsumik ajornartorsiutitaqarsimagaluaqisoq tamatuma aamma avaqqunneqarsinnaasimannginnera aalajangiusimavaa. Nuummi umiarsualivik nutaaq eqqarsaatigalugu taanna politikkikkut aalajangigaavoq.
- Inuttut inuuvunga naammagittaakannersoq, pisumili matumani Kalaallit Nunaanni allannguutinik annertoorujussuarnik pisoqarsimavoq. Umiarsualiveqarnikkut aaqqissuussinneq nutaaq atuutilersimavoq unammillernartullu RAL-imit aaqqinniarneqartussat amerlasoorujussuusimapput, taamaattumillu aamma RAL aqutsisunik tamangajalluinnarnik taarsiisimavoq. Qarasaasiarsornikkut aqutseriaaseq ukiut 20-t matuma siorna taarserneqarmat ajornartorsiutit suli annertunerupput – taamani nittartakkani inuit naapeqatigiittarfii taamaallaat pigineqanngillat. Qarasaasiarsornikkut aqutseriaaseq taarserniarlugu ukiut tallimat matuma siorna iliuuseqartoqarsimasariaqarunaraluarpoq, nunarsuarmimi ikorfartuisussaarussimavoq. Maannali tunniussaqarsinnaalersimavugut, naak ukiup affaata matuma siornatut suleriaaseqarunnaarsimagaluarluta, Kuno Fencker oqarpoq.
Akuliutissaagut
- Ukioq ataasingajak ingerlareersorlu ajornartorsiutit suli annertunerat ilinnut siulersuisut siulittaasuattut akuersaarneqarsinnaava imaluunniit akuliunnissannut piffissanngorpa?
- Soorunami akuliutissaagut. Pineqartoq peqataaffigiuarparput. Kisianni siulersuisut ingerlatsisuunngillat. Maanna aqutsisuusut Royal Arctic Linep suliassaanik unammilligassaanillu naammassinnissinnaanerat tatigilluinnarparput, Kuno Fencker oqarpoq.
Allaaserisaq tamaat AG-meersoq atuaruk, taanna uani ataani linki tooriarlugu isissutissarsiffigisinnaavat: