Siulersuisut imatut akissarsiaqassapput

Namminersorlutik oqartussat suliffeqarfiutaanni siulersuisut siulittaasui siulersuini ilaasortanit naliginnaasunit 2,5-riaammik akissaateqarnerulissapput. Maanna Royal Greenlandimi siulersuisut siulittaasuat ukiumut 500.000 koruuninik akissarsiaqalissaaq siulittaasup tullia ukiumut 300.000 koruuninik akissarsiaqalissasoq.

Namminersorlutik oqartussat suliffeqarfiutaanni siulersuisut akissaataat allanngorartuulissapput. Royal Greenlandimi siulersuisut siulittaasuat akissaateqarnerpaatut inissippoq taanna ukiumut 500.000 koruuninik akissarsiaqalissagami. KNI-mi siulersuisut siulittaasuat ukiumut 350.000 koruuninik akissaateqalissaaq.

Suliamut naapertuuttumik
Siusinnerusukkut akissarsiaqartitsinermut politikkimi kaaviiaartitat ingerlatseqatigiiffiup angissusaa imaluunniit suliassamigut assigiinngissitaarnera naammattumik tamatigut isiginiarneqarsimanngilaq. Tamatuma kingunerisaanik akissarsiat akisussaaffimmut, saqquminermut suliamillu tunniussinissamut siulersuisunut ilaasortanut piumasaqaatigineqartumut naapertuuttuaannarsimanngillat, namminersorlutik oqartussat nalunaarput.

Siulersuisut akissarsiatat assigiinngitsunut pingasut agguataarneqassapput siulersuisut siulittaasuat, siulittaasup tullia siulersuisunilu ilaasortat allat assigiinngitsunik akissaateqalissammata.

Politikkip nutaap kingunerisaanik akissarsiat siulittaasunut, siulittaasup tulliinut ilaasortanullu nalinginnaasunut annertussutsimikkut assigiinngissuteqalissapput, siulersuisunut ilaasortanut assigiinngitsunut siuliani taaneqartunut piumasaqaatit sulinissamilu naammassisassanut piumasaqaatit assigiinngitsuunerat pissutigalugu, namminersorlutik oqartussat nalunaarput.

Siulersuisut akissaataasa annertussusaat uani takuuk