Arctic Circle Race
Sisupiloortartoq Tuluit Nunaanneersoq Arctic Circle Raceqataassaaq
Sisamariarluni siornatigut OL-eqataasimasoq Chimene 'Chemmy' Alcott Sisimiuni ujakkaarnermi unammeqataassaaq
Chimene 'Chemmy' Alcott ujakkaarnermi Arctic Circle Racemi unammeqataasussat allat 144-t peqatigalugit unammeqataassaaq. Arctic Circle Race tallimanngorpat aallartissaaq nalunaaqutaq 10.00.
Chimene 'Chemmy' Alcott sisupiloornermi OL-imi sisamariarluni peqataasareerpoq siullerpaamillu Arctic Circle Racemi peqataalerluni. Ujakkaarnermi aatsaat siullerpaamik unammeqataalerpoq.
- Chimene 'Chemmy' Alcott sisupiloortartutut unammisartuujunnaareerpoq. Ujakkaarneq misileqqaarpaa qaammatit marluk matuma siorna, tuluit angutit sisamat timersortartut allat peqatigalugit Arctic Circle Raceqataalerpoq. Imminnut atsersimapput 'Arctic IV'-mik, kræftimullu akiuiniarnerup maluginiarneqarnissaa anguniagaralugu. Suliniullu 'ski 4 cancer'-imik taaguuteqarpoq, Arctic Circle Racemi aaqqissuisut tusagassiutinut nalunaaruteqarput.
Niviaq Chemnitz Berthelsenip peqataalinnginnera pissutaalluni arnani kina ajugaassanersoq nalunarallarpoq.
Martin Møller Arctic Circle Racemi arfinilissaa ajugaanissani anguniarpaa.
Arctic Circle Race aallartissaaq tallimanngorpat nalunaaqutaq 10.00. ACR.gl-imi aamma ARC-ip Facebookiani malinnaasoqarsinnaavoq.