Sissi Møller Kulturikkut illorsuarmi Taseralimmi saqqummersitsissaaq

32-nik ukiulik Sissi Møller Nuummi Københavimilu eqqumiitsuliornermik ilinniarfinnii ilinniarsimasuuvoq.

Ullumi sisamanngornermi nalunaaqutaq 16.30 taassuma saqqummersitassai Kulturikkut illorsuarmi Taseralimmi saqqummersinneqassapput.

Sissi Møller inuusukkaluarluni eqqumiitsuliortutut misilittagartuujuvioq tamatigoortoq. Suliaasa ilagaat frimærkinik arlalinnik suliaqarami kusassaatillu arlallit suliarereerlugit.

Sissi Nuummi peroriartornermini illoqarfimmi pisoqarfiusumi pinngortitamulli qanittumiinnera eqqumiitsuliaani aallaaviulluinnarpoq.

Una saqqummersitsineq taaguuteqarpoq COMPASSO meerarmi misigisat sumiissusersiorlugit inuunermi pisimasunik pingaartunik ujartuisuulluni, tassanngalu siumut ingerlaqqinnissamik siunertaqarluni.

Saqqummersitsinermi COMPASSO-mi Sissi Møllerip kiliortuut nillertoq atorlugu kiliortugaani, kingornalu qalipataani, ukiumi pinngortitami qalipaatit ilutsillu uummarissunermik, ineriartornermik qalipaatiginnermillu ersersitsivoq.

- Kiliortorlugillu qalipatanni qamani pigisat suaarutiginissaat oqariartuutaavoq, Sissi Møller oqarpoq

- Uannut pingaaruteqarpoq eqqumiitsuliornermi periutsit assigiinngitsut marluk ataatsimoortillugit suliarinissaat. Taamaasiornikkut sulilluarnerusarpunga, periutsit taakkua suliannut sinaakkusiilluartarmata, eqqumiitsuliortoq oqarpoq.

- Sissi Møller-p suliai suliarilluagaasut nutaanik isumassarsiorluarfiusinnaasut takuneqarnissaat innersuutiginaqaat, Taseralimmi saqqummersitsinernik aaqqissuisoq Pipaluk Lykke Løgstrup kulturikkut sulialimmit NEBULA-meersoq oqaluttuarpoq.

- Qulequtaa ’sumiissusersiut’ inunnit ilisarineqarluarsinnavoq, ingammik nunatsinni illoqarfinni pinngortitamut qanittuni najugaqartuulluni. Taamatuttaaq inuunitsinni siunertaqarluta naleraqarluta ineriartortuarnissarput kaammattuutigimmagu isumaqatiginaqaaq.

Saqqummersitat oktoberip 15-ata tugaanut takuniarneqarsinnaapput.