kyststi
Sissami ikaartarfik takornarissanut misigisaqartitsisinnaasoq
Nuummi Nuutoqqamiit ombudsmandip illuata tungaanut "Saqqarliit" qanittumi sissakkut aqqusineeraliortoqassaaq. Ikaartarfik sissamiittussaq qisunnit sananeqassaaq.
- Ikaartarfik sukisaarsaarfissanik nittartaassiffissanillu periarfissaqarluassaaq, Nuummilu innuttaasut takornarissallu kikkulluunniit qasujaallisarfigalugulu silami sammisassanut periarfissaqarluassapput, Kommuneqarfik Sermersuumi Aningaasaqarnermut Inuussutissarsiutinullu ataatsimiititaliaata sisamanngornermi suliarineqartumi allassimasoqarpoq.
Sissakkut aqqusineeqqap siunertaa
Pilersaarut piffissami sivisuumi piareersarneqarsimavoq massakkulli kommunip pilersaarutaani Sermersooq2024-mut ilanngunneqarpoq.
Siunertaa ima nassuiaaserneqarsimavoq:
- Sissami tikinneqarsinnaasumik aqqusiornissaq
- Meeqqanut, inuusuttunut utoqqarnullu pisuttuarfissaq naliitsumik misigisassartalik
- Takornarianut pilerinartumik illoqarfimmik nittarsaassinermi atorneqarsinnaasumik pilersitsinissaq
- Pitsorluttunut qasujaallisarlutillu arpattunut inissaqartitsinissaq
- Nuummi inuit peqqinnerulernissaannut iluaqutaasussamik innuttaasut illoqarfiup qanittuani pissarsilluarnartumik qasujaallisarnissamut silamilu sammisassaqarnissamut avatangiisigissaarfiusumi pinngortitamiissinnaanissaannik periarfissaqartitsinissaq.
- Isikkua atorluarsinnaaneralu eqqarsaatigilluarlugit ilusilerneqarlunilu sananeqassasoq.
- Aqqut taanna qaqqat sivinganeri pissutigalugit ullumikkut angallavigiuminaatsuuvoq, taamaattumillu Illoqarfimmik Inerisaaviup innersuussutigaa, innaarsummut tunngasumik qisummik sanaamik ikaartarfilerneqassasoq. Aqqummi sumiiffinni aalajangersimasuni nasittarfiliortoqassaaq, tamakkunani pisuttuartut immamut isikkivilerlutik uninngaarsinnaassapput. Sissakkut aqqusineeraq manissuussaaq, maniissinnersaalu majuartarfeqartinneqassalluni. Uninngaarfissiat pitsorluttunut utoqqarnullu nasiffiusinnaapput. Aqqusineeraq qullilersugaassaaq, taamaalilluni qaammatini taarsisaleruttorfiini ukiukkullu aqqutigineqarsinnaalluni aamma aputaajarneqartassaaq, pilersaarut Aningaasaqarnermut Inuussutissarsiutinullu ataatsimiititaliap ippassaq saqqummiussaani tamanna erserpoq..
Immikkoortoq siulleq 6 mio koruuninik akeqassaaq
Siullermik immikkoortoq siulleq siulliunniarneqarpoq, immikkoortulli allat sisamat 2020-p tungaanut sanaartorneqassallutik. Immikkoortoq siulleq akisunersaavoq, taamaammat 6 mio koruuninik, ukiuni tulliuttuni pingasuni 2 mio koruuninik pinnani massakkut aningaasaliisoqarnissaanik piumasarineqarpoq.
Kommuneqarfik Sermersuumi Illoqarfimmik inerisaavimmi sulisut siunnersortit avataaneersut suleqatigalugit sissami aqqusineerassap immikkoortuanut siullermut najoqqutassamik suliaqarnikuupput, Illoqarfimmik Inerisaaviup immikkoortoq siullermut tunngasumik aqqusineeqqap nalaani illumi piginnittut paasissutissiivigineqarnissaannut aggersarneqassapput, taakkuummatami suliassamut tassunga kalluarneqartutut misigisimasinnaasut.
Aningaasaateqarfiit neriuutigineqartut
Kommunip neriuutigaa aqqusineeraliornissamut namminersortut aningaasaateqarfiillu Nuup eqqaani aqqusineeraliornissamut aningaasaleeqataasinnaassasut.