sipaarniarneq
Sisorartartut kattuffiata siulittaasua: Sipaarniarnissamik siunnersuutit tunuartinneqarlik
Naalakkersuisut timersorneq 600.000 koruuninik sipaarniarnerat Sisorartartut Kattuffiata siulittaasuata Timooq Mølgaardip isornartorsiorpaa. Timersorneq annertuumik sipaarniartoqarneranit eqqorneqassaaq, oqarpoq
Aningaasanut inatsisikkut 50 millioner koruuninik sipaarniuteqartoqarpoq, GIF-illu aningaasaliissutaasartunit 8 millioner koruuningajannit 600.000 koruunit annaasussanngorpai, tamanna Sermitsiaq.AG-mit allaaserineqartareerpoq.
Kalaallit Nunaanni Timersortartut Kattuffianni siulittaasup Nuka Kleemannip Naalakkersuisut sipaarniarnerat AG-ikkut isornartorsiortareerpaa.
- Sipaarniutit meeqqanik inuusuttunillu sulinitsinni malunniutissapput. Aappaagumullu Arctic Winter Gamesimut timersornikkut piareersarneq eqqorneqassaaq, Nuka Kleemann oqarpoq.
Ineriartornissamut kalluaaneq
Naalakkersuisut timersornermut sipaarniarnerat Kalaallit Nunaanni Sisorartartut Kattuffianni siulittaasup Timooq Mølgaardip aamma isornartorsiorpaa.
- Inatsisartunut qineqqusaartoqaraangat timersorneq illersorneqartuaannarpoq. Politikkerilli neriorsuutitik eqquutsinngisaannarpaat. Sipaarniartoqarnera timersortartunut annertuumik eqquissaaq. Nunatsinni timersornerup tungaatigut ineriartortoqarluarpoq, tamanna politikkerinit kalluarneqarpoq, Timooq Mølgaard oqarpoq.
Sisorartartut kattuffiat ujakkaartartunik, sisupiloortartunik, Snowboard & Freestyle Ski-ttartunik immikkoortortaqarfeqarpoq. Timersortartut kattuffiannit tapiissutaasut sisorartartut kattuffiannit immikkoortortaqarfimminut tapiissutinik agguaassisarpoq.
- Kattuffiit namminneerlutik Tips og Lottomut tapiissutinik qinnuteqartalissasut Naalakkersuisunit siunnersuutigineqarpoq. Tassungali qinnuteqarneq assigiinngitsunik atugassarititaqartarpoq. Naalakkersuisunit tapiissutaasartut nunanut allanut unammisartuinut katersuutitsinernut atorneqartarput. Taakku tapiissutigineqartut kattuffinnut pingaaruteqartorujussuupput, taamaammaat Naalakkersuisut timersornermut sipaarniarnerminnut siunnersuutertik tunuartissagaat kaammattuutigaara, Timooq Mølgaard oqarpoq.
GIF-ip siulittaasuata Nuka Kleemannip Naalakkersuisut timersornermut sipaarniarnissaannik isornartorsiuinera pillugu aviisimi AG-mi nummer 17-mi atuarneqarsinnaavoq. Aviisi ataani pisiariuk: