atorfik nutaaq

Sisorartartoq Narsarsuup mittarfiani pisortanngorpoq

Tupaarnaq Kreutzmann Kleist 1. januar atuutilertumik Narsarsuup mittarfiani pisortanngussaaq. Taamaasilluni Nanortalimmi, Narsami Qaqortumi heliportit pingasut Kujataanilu helistop-it arfineq-marluk akisussaaffigilissavai

Pikkorilluinnarluni sisorartartuusimasoq Tupaarnaq Kreutzmann Kleist Narsarsuup mittarfiani pisortaaninngussaaq. Mittarfeqarfiit tusagassiuutinut nalunaarummi allapput.

- Tatigineqarnera assut tulluusimaarutigaara. Qaammatialunnguarnimi taamaallaat suliffeqarfimmiissimavunga taamaammat piginnaasakka upperalugit toqqarneqarnera aqutsisunut qujassutigerusuppara, Tupaarnaq Kreutzmann Kleist oqarpoq.

Tupaarnaq Kreutzmann Kleist, 2017-p aasaanerani flyvepladslederitut Mittarfeqarfinni sulilerpoq, kingornalu mittarfimmi pisortaanerungallartutut atorfinitsinneqarluni. Tamanna mittarfiup pisortaa Storch Lund ukiuni 28-ni sulereerluni 1. november 2017 atuutilertumik tunuarniuteqarnerata kingorna pivoq.

Tupaarnaq Kreutzmann Kleist annertuumik timersornermik suliaqarsimavoq, ilaatigut kalaallini sangusaartartuni arnartatuaalluni OL-imut toqqarneqarsimalluni tassanilu inuusuttut Sloveniami sangusaarnerini bronzennassimalluni. Tupaarnap inooqatini Narsarsuup avatinnguani savataatilik najorpaa. Taakku meerartaassamaarput taamaammat 2018-imi upernaakkut sulinngiffeqarnissaa naatsorsuutigineqarpoq. Mittarfimmi pisortamik pisortanilluunniit paarlatsissat isumaqatigiissutigineqalerput.

Tupaarnaq Kreutzmann Kleist mittarfimmi pisortartut toqqarneqara pissusissamisoortoq mittarfeqarfiit ima oqaatigaat:

- Tupaarnaq Kreutzmann Kleist piffissami sivikitsumi inuusuttuulluni aqutsilluarsinnaanini takutippaa. Mittarfimmi pisortaangallarnermini suliani tamaasa naammaginartumik naammassilluarsimavai, taamaammat Narsarsuup mittarfiani pisortatut akisussaaffimmik tunineqarnissaa pissusissamisoorpoq, Mittarfeqarfiit pisortaanera Marie Fleischer oqarpoq.

Powered by Labrador CMS