Nuuk
Sisorartarfimmik siunnersuut taperserneqartoq: Isumassarsialatsialaavoq
Quassussuup tunuani ujakkaartarfimmik pilersitsisoqassangaluarpat periarfissanik arlalinnik takkuttoqassasoq, Kommuneqarfik Sermersuumi kommunalbestyrelsimut ilaasortap Uju Petersenip (IA), oqaatigaa
Kommunenqarfik Sermersuumi kommunalbestyrelsimi ilaasortap, Uju Petersenip (IA), Kim Godtfredsenip Morten Jørgen Heilmannillu Quassussuup tunuani ujakkaartarfimmik pilersitsinissamut siunnersuutaat, tapersorpaa.
Uju Petersenip nammineq ujakkaarnermik aallutaqartartuungami siunnersuummi ajornartorsiutit taakkartorneqartut ilisarisinnaalluarpai.
- Siunnersuut tapersorpara. Ukiunimi kingullerni ujakkaartarfiit sisoraatitsitsinnut aserorsaataasartumik ujaraaraqarput tamannalu ajornartorsiutaavoq. Ujakkaartarfiup nuunneqarnissaa iluaqutaangaatsiassaaq, isumassarsialatsialaavormi, Uju Petersen Sermitsiaq.AG-mut oqarpoq.
Atuaruk: Nuummi sisorartarneq unammillerneqarpoq - anguniagartuumik pilersaaruteqartoqarpoq
Periarfissat arlallit
Ujakkaartarfiup nuunneqarnisssaanut pitsaaqutissat marluk, taassuma tikkuarpai.
- Quassussuup tunuani nunataq innaqarnerugami unammillernarneruvoq. Ujakkaartarfillu maannakkornit takinerusinnaavoq. Taamaammat siunnersuut piviusunngortinneqassappat ujakkaartartut amerlanerulersinnaapput, Uju Petersen erseqqissaavoq.
Ineriartortitsinneqarsinnaaneralu annertusoq, taassuma oqaatigaa.
- Takornariallu aamma amerlanerusunik periarfissaqalissapput, tassungami aqqutaa ungasinngilaq. Tassanimi neriniartarfimmik isikkivigissumik pilersitsisoqarsinnaavoq. Aammalu massakkut ujakkaartarfiusumi siunissami inissiat arlallit sanaartorneqarsinnaallutik. Siunnersuut arlalinnik periarfissaqarpoq, taamaammat piviusunngortinneqarnissaa neriuutigaara, Uju Petersen oqarpoq.