kinguaassiuutit atornerat
Sisimiut ullumi Gay Pride-mut piareersimava?
Arfininngornermi unnukkut Kalaallit Nunaanni illoqarfiit annersaata tulliani Arctic Sounds-festivalimut atatillugu illoqarfimmi pride parade ingerlanneqassaaq
Upernaaq manna Sisimiuni aaqqissuussarpaaluit alutornartut ingerlanneqarput.
Arctic Circle Racep nalliuttorsiutigineqareernerata kingorna maanna maanna nipilersornermik festivali (Arctic Sounds) ingerlanneqassaaq, tamatumunngalu atatillugu eqqumiitsuliortut ilaat arfininngornermi unnukkut ingerlaaqatigiissapput kinguaassiuutit atortarnerat takutinniarlugu.
Equngasumik tulluusimaarneq
Norskit arnat nipilersoqatigiit Kuuk, ilaatigut Nuka Bisgaard peqatigalugu, unnugu nalunaaqutaq qulingiluanut Sisimiuni lastbiilinik angalaassapput nipilersorlutik oqalugiartoqarlunilu.
Allamut tamamut, ´nalinginnaasumik atoqatigiittartunut´, tassa angutinut, arnanik kajungerinnittunut, arnanullu angutinik kajungerinnittunut, inissaqassaaq, aaqqissuussisut nalunaarput.
– Nuannaarutigeqaara ukioq manna gaypride ingerlanneqassammat Arctic Sounds norskillu rap-ertartut Kuuk, suleqatigalugit ingerlanneqassammat, Nuka Bisgaard Sermitsiaq.AG-mut oqarpoq.
– Asasakka Sisimiuni LGBT-t / arnaqatiminoortartut, anguteqatiminoortartut, angutinik arnanillu atoqateqartartut, transistit tapersersortillu. Neriuppunga unnugu aqqusinermiikkumaartusi.
Ingerlaaqatigiinneq aallartissaaq nalunaaqutaq qulingiluanut, nalunaaqutarli arfineq-marlunniit kulturip illorsuani oqalugiartoqassaaq, filmertoqassaaq nipilersortoqassallunilu.
Ukiuni kingullerni gay-/LGBT-mik aaqqissuussinerit marluk Sisimiuni ingerlanneqartarsimapput.
2014-imi novembarimi kulturip illorsuani Taseralimmi Gay Galla ingerlanneqarpoq, tassanissaarlu suliniummit Gay Greenlandimit assit saqqummersinneqarput, ukiullu sisamat-tallimat matuma siornatigut pridemik ingerlaaqatigiinneq mislinneqarpoq.