isumaqatigiissut
Sisimiut Kangerlussuullu akornanni aqqusinniortoqarnissaa qanillisoq
Sisimiut Kangerlussuullu akornanni aqqusinniortoqarnissaanut suliaqartussamik suleqatigiissitamik pilersitsisoqarnissaa pillugu Naalakkersuisoq Erik Jensen, Borgmester Malik Berthelsen-ilu isumaqatigiissusiorput.
Qeqqata Kommunias ønske om vej mellem Kangerlussuaq og Sisimiut er kommet et skridt nærmere.
Attaveqaqatigiinnermut Naalakkersuisoq Erik Jensen (S) borgmesteriullu Malik Berthelsenip (S) Qeqqata Kommuniata Kommuninut, Nunaqarfinnut, Isorliunerusunut, Attaveqaqatigiinnermut Ineqarnermullu Naalakkersuisoqarfiullu akornanni suleqatigiissitamik pilersitsisoqarnissaa isumaqatigiissutigaat.
Namminersorlutik Oqartussat tusagassiuutinut nalunaarummi allapput.
Atuaruk: Naalakkersuisut iliuuseqarnissaat borgmesterip piumasaraa
Qeqqata Kommuniata kissaataa piviusunngortinneqarpoq
- Sisimiut Kangerlussuullu akornanni aqqusinniortoqarnissaanik Qeqqata Kommunia kissaataanut tunngasunik suleqatigiissitaq suliaqassaaq, Namminersorlutik Oqartussat nalunaaruteqarput.
Qaammatip ingerlanerani borgmester Malik Berthelsen aqquserniornissamut atatillugu Naalakkersuisunut iliuuseqarnissaat ujartorpaa. Taamaasilluni kissaataa piviusunngortinneqarpoq.
Atuaruk: Qeqqata Kommunia aqqusinniornissaq pillugu paasisaqarusuppoq
Aprilip qaammataa nallertinnagu nalunaarusiorneq
Ilanngullugu paasissutissiarineqarpoq, 2018-imi apriilip aallaqqaataa tikitsinnagu suleqatigiissitaq nalunaarusiamik Naalakkersuisunut Kommunalbestyrelsimullu saqqummiussissasoq naatsorsuutigineqarpoq.
- Qeqqata Kommuniani takornarialerinerup ineriartortinneqarnissanik, soorluttaaq inuutissarsiutinik ineriartortitsinissamut assartuinernilu periarfissat pitsaanerulersinneqarnissaanik Qeqqata Kommuniata kissaateqarneratigut, aqqusinissaq pillugu suliniutip tunuliaqutigaa, tusagassiuutinut nalunnaarummi erseqqissaassutigineqarpoq
- Tamanna tunngavigalugu Qeqqata Kommuniani naalakkersuisoqarfimmilu atorfilittat, suleqatigiissitap suliassaannut tunngatillugu nassuiaasiorniarput. Namminersorlutik Oqartussani Kommuninut, Nunaqarfinnut, Isorliunerusunut, Attaveqaqatigiinnermut Ineqarnermullu Naalakkersuisoqarfiup suliassaq suliarissavaa, nalunaarummi allassimavoq.
Tamatuma saniatigut naalakkersuisoqarfinni allani, soorlu Inuussutissarsiornermut, Suliffeqarnermut, Niuernermut Nukissiuteqarnermullu Naalakkersuisoqarfimmi kiisalu Aningaasaqarnermut Akileraartarnermullu Naalakkersuisoqarfimmi ilisimasat suleqatigiissitap suliamut tunngatillugu akuutissavai. Soqutigisaqaqatigiinnit namminersortunit, aningaasaleeqataasinnaasuniillu paasissutissanik suleqatigiissitaq aamma piniarsinnaassaaq.