Sisimiut eqqaani pinngortitami ikuallannermit pujoq

Sisimiut tamakkerlugu pujoqarpoq, tamannalu Nassuttuumi nunap ikuallanneranit pinngortuulluni, anorillu kujammut samminera patsisaalluni Sisimiut tamakkerluni pujuinnanngorsimavoq.

Pujoq Nassuttuumi ikuallattuminngaanneersoq Qeqqata Kommunia Sisimiuni innuttaasunut nalunaaruteqarsimavoq.

Amitsorsuup eqqaani nuna ikuallattoq toraarneqarsimavoq, Upalungaarsimanermulli pisortaq Ole Kreutzmann ikuallaffiusumit assinik pissarsisimavoq.

- Ikuallannerli taanna annikitsunnguummat ulorianartutut isigineqanngilaq, namminerlu qamittussaasutut nalilerneqarluni. Amitsorsuup eqqaani nuna ikuallattoq taamak annertutigisumik pujuliortitsisuunngilaq, kommuni allappoq.

Pujoq uloriananngitsoq

Nunap immikkoortuani nakorsaanerup Helle Olsen nalilerpaa, Sisimiuni pujoq maannakkut ulorianaateqanngitsoq,
taamaattorli anersaartorfikkut nappaateqartunut iluaalliortitsisinnaalluni.

Qeqqata Kommuniani Qatserisartut nunap paningaatsiarnera patsisaalluni, nuna ikuallaratarsinnaammat nunap timaani ikumaartitsineq mianersuutigineqassasoq mianersoqqussutigaat.

• Tamatuma saniatigut innuttaasut tullinnguuttutigut eqqumaffiginneqquneqarput:
• Eqqagassanik asimi ikuallaannginnissaq.
• Eqqagassat illoqarfimmut oqquttarnissai pingaartumik puiaasat allallu ikuallariaannaat.
• Killutigut iganissaq isumatusaartumik pinissaa.
• Nunami ikumaartitsinnginnissaq asuli.
• Sikaritsit kimmivikui pinngortitamut iginneqassanngitsut