nutaarsiassatsialak

Sisimiuni timersortarfik ernumagineqartumit ajunnginnerusoq

Sisimiuni inoqarfiunerpaasartoq, timersortarfik, upernaap ingerlanerani piffissap ilaani matoqqanikuuvoq. Kisianni maanna naatsorsuutigineqartumit ammajaarnerunissaanik isikkoqarpoq

Sisimiuni timersortarfiup ammarneqarnissaanut utaqqineq qujanartumik naatsorsuutigineqartumit sivikinnerussaaq.

Tamanna Qeqqata Kommuniata qularnaveeqqusiineratigut iluarsartuunneqalerneranik pissuteqarpoq.

Taamaattumillu timersortarfik ammarneqarsinnaanngussaaq, atuisartullu piffissap ilaani atuinissaminnut periarfissaqarsimanngitsut nuannarissavaat.

Ukioq nalunaarut alianartoq
- Kingusinnerpaamik qaammat aggusti naatinnagu inersuartaa ammassasoq naatsorsuutigaarput, timersortarfimmi siulittaasoq, Erik Jensen (S) oqarpoq.

Martsimi Sisimiuni timersortarfimmi siulersuisut nalunaarutigaat Sisimiut Timersortarfianni oqummik siumuisoqarsimasoq, tamatuma nassatarisinnaagaa Sisimiut Timersortarfiata matugallarnissaa.

Atuaruk: Sisimiut timersortarfia oquk pissutigalugu matussaaq

Kingorna misissuinerit annertusisat ingerlanneqarsimapput, taakkulu takutippaat oquk qujanartumik annertuumik siaruaassimanngitsoq.

- Qujanartumik nateq ajoquteqanngilaq, kisiannili qilaaq teqeqqumiittoq oqoqarpoq, timersortarfimmi siulittaasoq oqaluttuarpoq.

Maajimi juunimilu ammasoq
- Qalissiat nutaanngilisimasut qulluulersimanerisigut oqoqalersimasoq tamarmi taarsersorneqassaaq. Natermili putuaqqat (soorlu banderit naparutaasa putui sinaaniittut) asaanermi isugutsertarsimasut aamma taarsersorneqassapput.

Taamaattumillu timersortarfik nalinginnaasumi maajimi juunimilu ammasinnaasimavoq.

Atuaruk: Sisimiuni qaqqap iluani naluttarfimmut millionilikkaat inissittut

Oquup pinngortarneranik aallaaviusut innarlerneqarsimasullu qaammat juuli aallartiffigalugu sanasunit iluarsaanneqalissapput, naatsorsuutigineqarlunilu aggustimi naatinnagu naammassereerneqarsimanissaat.

Ukiariartornerani pilersaarutit ilagaat timersortarfiup kiassaateqarfii aamma silaannarissarfii nutaamik atortulersorlugit aaqqiiffiginissaat.

Taamaalilluni atuisunut tamanut silannarmik minguitsumik naapertuuttumillu kissassuseqartussamik avatangiiseqalissapput, aammali ingerlatsinikkut aningaasartuutit malunnaatilimmik apparneqarsinnaassaput.

Suliniut akisooq
Missingersuutit kutippaat ukiormanna suliassat 3million koruunit missaani akeqarumaartut, nuannaarutigeqaarpullu Qeqqata Kommuniata aningaaserivimmut nutaamik attartornissatsinnut qularnaveeqqusiisinnaasimammat, taamaalilluni Sisimiuni timersortarfik iluarsartuunneqarsinnaalersillugu.

- Sisimiut Timersortarfiat suli annertuumik aserfallatsaaliinikkut kinguaattooqqassuteqarpoq, taamaattumik ukiuni tulliuttuni annertuumik aningaasaliissutissanik pisariaqartitsivoq. Tamannalu Qeqqata Kommunia kiisalu Kultureqarnermut Naalakkersuisoqarfik aqqutigalugu oqaloqatigiinnerit pitsaasut ingerlanneqarput, Jensen oqarpoq.

Aasaq naallugu timigissartarfik, sauna aamma helsekabine ammasassapput.

Powered by Labrador CMS