Taseralik
Sisimiuni tillinniartoqarlunilu aserorterisoqareersoq politiit ikioqqupput
Angut 21-nik ukioqartoq tigusarineqarpoq kisianni pinerluttut arlaqartut suli Sisimiuni politiinit tigusarineqanngillat
Angut 21-nik ukioqartoq Sisimiut eqqartuussiviani killisiorneqareernermi kingorna politiinit tigummigallarneqarpoq.
Kulturikkut illorsuarmi Taseralimmi tillinniartoqarlunilu aserorterisoqarsimasoq politiit januaarip arfineq aappaanni nalunaarfigineqarput.
Angut 21-nik ukioqartup politiinut oqaatigaa 20-t 25-llu angornanni ukioqartut pinerloqatigisimallugit. Taseraliup silaannarissartarfiatigut isersimapput.
Matut pingasut-tallimat igalaasartallit aserorsimagaat aamma allanik aserugaqarsimasut politiit nalunaarutigaat.
Illorsuup iluani immiaaqqanik allanillu imigassanik tillipput, it-mut aamma atortoq tiguaat kiisalu aningaasaasiviup iluaniittunik iluatsinngitsumik tilleriaraluarsimallutik.
Atisaarniarfimmi iluatitsinngitsoorneq
Sisimiuni politiit aamma ilimagaat pinerluttut atisaarniarfimmi tillinniarniarsimagaluartut iluatsinngitsumik. Atisaarniarfiup kalerrisaarutaa aallartimmat pinerluttut qimaasimapput.
Angut 21-nik ukiulik Sisimiut eqqartuussivianni killisiorneqareernermi kingorna politiinit ulluni 27-ni tigummigallarneqarnissaa aalajangerneqartoq, politikommisæri Karl Jørgen Lennert ilisimatitsivoq.
- 20-nit 25-nut ukiullit pinerloqatigisimallugit politiinut oqaatigaa, angutaanersut arnaanersulluunnit oqaatiginngilai, Karl Jørgen Lennert Sermitsiaq.AG-mut oqarpoq.