Aalisarneq
Sisimiuni saarullinnik tusineq ammaqqinneqarpoq
Sisamanngormat tunisinerup unitsikkallarneqarnerata kingorna Sisimiuni bundgarnersortut Royal Greenlandip aalisakkanik suliffissuanut saarullinnik tuniseqqissinnaalerput
Sisimiut eqqaani bundgarnersornerup aallartiaarnera saarullippassuaqarneralu pissutigalugit Royal Greenlandip Sisimiuni aalisakkanik suliffissuata saarullinnik tunisineq sapaatip akunnerani kingullermi unitsikkallarpaa.
Maannali tunisineq ammaqqinneqarpoq, Royal Greenland paasissutissiivoq.
Tunisinissamut pilersaarut
Tunisinermik unitsitsigallarneq, sisamanngormat ullaakkut aallartinneqartoq, atorunnaarsinneqarpoq aalisartunit aallartitat Royal Greenlandimillu suliffissuani pisortat sapaatiummat ataatsimiinnerminni isumaqatigiissutigimmassuk aalisartut pisaminnik tunisisinnaasut, tunisinermut pilersaarut malillugu.
– Aalisartut aallartitaallu isumaqatigiissutigaarput tunisinermut pilersaarummik eqqussiniarluta. Taamaattumik aalisartut ullumimiit, ataasinngornermiit, Sisimiuni suliffissuarmut Sarfannguanilu tunitsivimmut killilimmik tunisisinnaalerput, Royal Greenlandip Sisimiuni suliffissuani pisortaq Hans Lars Olsen oqarpoq.
Tunisassat killeqarput
Sisimiuni aalisartu aallartitaasa Royal Greenlandillu pisortaasa isumaqatigiissutigaat kutterit ulloq allortarlugu tunisisinnaasut - aannerpaamilli pinerit tamaasa 5 tonsinik, umiatsiaararsortullu ullut tamaasa 700 kiilunik tunisisinnaasut.
Nunaqarfimmi Sarfannguani aalisartut tunisinnaasaat aamma killeqarpoq. Ullormut karsit 15-it tunineqarsinnaapput, royalgreenland.gl paasissutissiivoq.
Sulisussaaleqipput
Hans Lars Olsenip neriuutigaa saarullinnik tunisassiornermi holdeqatigiinnik ataatsinik unnukkut sulisartussanik pissarsisinnaassalluni aammalu holdinik marlunnik sinnersaraattartussanik pilersitsisinnaassalluni. Ullumikkut ullorsiorlutik saarullilerisut 35-iupput.
– Suliffissuarmi tunisinerup unitsinneqarneranik tusagassiorfiit nalunaarutiginninnerisa kingorna inunnit, saarullinnik tunisassiornermik sulerusuttunit, saaffigineqarsimavugut. Sulili inuppaaluit amigaatigaavut. Taamaattumik maanna aalajangerpugut Sisimiuni illoqarfiata radioatigut sulisussarsiorniarluta, neriulluta amerlanerit saarullinnik tunisassioqataarusussasut, suliffissuup pisortaa oqarpoq.
Royal Greenlandip Sisimiuni suliffissuani sulisut maannakkorpiaq 130-t missaanniipput, raajalerisut, assagiarsulerisut aammalu suannik saarullinnillu tunisassiortut. Suliffissuup pisortaata neriuutigaa saarullinnik tunisassiornermik sulisussanik 30 aamma 35-it akornanni amerlassusilinnik pissarsisinnaassalluni.