Sisimiuni qaqqap iluani naluttarfimmut millionilikkaat inissittut

Kiisami Qeqqata Kommuniani naluttarfimmut iluameertumut millionilikkaat inissinneqarput.

Arctic Circle Racep ukiut 20-issaanni ingerlanneqarnerani illoqarfik qungujulaffiunerani, bogmesterip Hermann Berthelsenip (S) nutaarsiassaq annertooq saqqummiunniarlugu aalajangersimavoq.

Atuilluarluni sanaartorneq
Sisimiuni naluttarfissaq ukiuni arlalinni pilersaarutaavoq annertooq. Naluttarfik Sisimiut qaqqaasaq ilaanni illoqarfimmi Taseraliup eqqaani sananeqassaaq.

Qaqqap iluaniisinniarneqarnera avatangiisitigut arlalitsigut iluaqutitaqassaaq. Naluttarfinnut nalinginnaasunut sanilliussigaanni, qaqqap oqorsaasinnaanera atorluarneqartussaammat, pingaartumik nukinnik atuinissaq 50 procentimik annikillisinneqassaaq.

Atuaruk: Sisimiuni iluatsittoq namminersornissamut aamma nutaamik pilersaarutinut periarfissanippoq

Ilutigalugu naluttarfissamut isaariaq kisimi issittumit sunnertittartussaammat, silataata aserfallatsaalineqarnissaanut suliassaq annertunavianngilaq.

A.P Møller Fondenip aningaasaateqarfianit 50 millionit
Suliniutip Qaqqap iluani Naluttarfissap, innaallagissiorfimmut diesel-itortumut 2010-mi taarsiutaasumit erngup nukinganik nukissiorfimmit innaallagissamik pilersorneqassaaq. Illoqarfimmi ikuallaavimmi kissaq sinneruttoq atorlugu Qaqqap iluani Naluttarfissaq kiassarneqassaaq, tamannalu iluatsillugu ikuallaavik pitsanngorsaavigineqarlunilu allilerneqassalluni.

A.P. Møller og Hustru Chastine Mc-Kinney Møllers Fond til almene Formaal tukkorlutik 50 millionit koruuninik aningaasaliinerisigut, ataatsimoortumik suliniut maanna piviusunngortinneqarsinnaalerpoq.

Tatiginninnermut qujanaq
Qeqqata Kommunia suliniummut 7 mio. koruuninik aningaasaliissaaq.

- A.P. Møller Fondenip taamak annertutigisumik aningaasaliissuteqarnera Qeqqata Kommunalbestyrelsia Sisimiunilu innuttaasut sinnerlugit qujamasullungalu innimisuppunga, Qeqqata Kommuniani borgmester, Hermann Berthelsen oqarpoq.

Ilinniartunit eqqarsaataat
- A.P. Møller Fondenip uagutsinnut Kalaallit Nunaannilu innuttaasunut tatiginninnermik takutitsisimanera illoqarfitsinni suleqatigisagut suli suleqatigalugit Qeqqata Kommuniani tatigineqarsinnaanitsinnik takutsitsissaagut.

Atuaruk: Politikkimi uummarissaaniarlutik meeqqat isummersorfiannik pilersitsiniartut

Suliniut Danmarks Tekniske Universitetimi, Norges Teknisk-Naturvitenskapelige Universitetimi aamma Kalaallit Nunaanni Aatsitassanut Ilinniarfimmi ilinniartut suleqatigalugit ukiut qulit ingerlanerini ineriartortinneqarpoq.

Danmarks Tekniske Universitetimi aamma Norges Teknisk-Naturvitenskapelige Universitetimi ilisimasalinnit ilinniartut ilitsersorneqarnikuupput.

Qaqqami sanaartorneq nutaaq
Ukiorpassuit ingerlanerini Norge qaqqap iluani sanaartortarpoq, suliniutillu piviusunngortinneqarnissaanut norgemi ilisimatuut kommunimut siunnersuisuunikuullutik.

Kalaallit Nunaat eqqarsaatigigaanni, siunissami qaqqat iluini timersortarfissanik, qerititsiveqarfissanik, biilinut inissiivissanik il.il. sanaartortalernissanut suliniut manna aallarniisuussaaq.

'Qaqqap iluani Naluttarfissaq' 2018-ip naanerani naammassillugu atulerneqarsinnaassasoq naatsorsuutigineqarpoq.

Atuaruk: ACR-imi aallartinnermi isiginnaartut 4.000-t neriuutigai