acr 2016
Sisimiuni nalliuttorsiortoqarnerani seqinnerluni arpaffissaalluassaaq
Arctic Circle Racemertoqarnerani ukioq manna silaginnissaa naatsorsuutigineqarpoq. Kisianni kunngissaq peqaataasoq nunat tamalaaneersut ikinnerusuusitippai
Sisimiut pingasunngornermi ualikkut ujakkaarfissaqqilluni silagittupilussuuvoq.
Silassap allanngujaatsup aamma arpaqataasussat nalliuttorsiorluni arpannissamut neriuuteqarnerutippai, tassami siornamit atoruminarnerusinnaammat, taamani ullut arpaffiusut pingajuat kingulliusoq taamaatiinnarneqartariaqarnikuuvoq.
Arpattut aatsaat taama amerlatigisut
Pingasunngornermi seqineq Nalunnguarfiup Tasiani apuuffissami kusanartumi qullasippoq, maannakkullu ullormi arpaffiusussami kingullermi, sapaammi, annikitsumik kiatsinnissaanut taamaallaat DMI ilimasaaruteqarpoq.
Arctic Circle Race ukioq manna aatsaat taama peqataasoqartigissaaq, nunarsuarmi tamanit aggersut 226-t peqataassapput.
Naak Sisimiuni arpanneq tusaamaneqarluaraluartoq, ukioq manna ukiut 20-ssaannik ingerlanneqarpoq, nunanit tamalaaneersunit peqataaffigineqartarnerminut ilisimaneqarluaraluarluni, ukioq manna silarsuup ilaanit peqataasut ikinnerusuusipput.
Nunanit allaneersut ikinnerusut
Ilimanarpoq kunngissaq Frederiup peqataanissaanut saqqummiussinerup, Kalaallit Nunaannit aamma Danmarkimit peqataasussat amerlanerulersikkai.
Peqataasut amerlanerpaartaat Kalaallit Nunaanneerlutill Danmarkimeerput, taakku saniatigut gruppit marluinnaat Tyskiupput aamma Tuluupput.
Nittarsaassinerusariaqartut
Aammali Svenskit marluk, Amerikamiut pingasut, Schweizimeersut marluk, Canadamiut marluk aamma Australiameersoq ataaseq peqataalerput.
Arpannerup misilittagartoortaasa ilagaaat, Tyskeq Klaus Jeckel, ukioq manna ACR-mut 16-issaanik peqataalersoq. Taassuma ernumassutigaa, Sisimiuni arpattarneq nunanit tamalaanit peqataaffiunnginnerulernissaa.
- Arpannerup nunani allani malunnarnerulersinnissaa pisariaqarpoq, Sermitsiaq.AG-mut oqarpoq.
Pappilissanik agguaaniaraluartoq
- Nunarsuup sinnerani nittarsaassilaanngikkaanni, naalagaaffeqatigiinnerup iluaniinnaq arpannerulissasoq, taanna isumaqarpoq.
Arpattartutoqaq Tysklandimeersoq oqarpoq, pappilissanik ACR-mut ikiuunniarluni, Europami ujakkaarluni arpannernut peqataaffigisamini pappilissanik agguaalluni misiliigaluarpoq.
- Kisianni arpannermut aqutsisut atortunik ajoraluartumik nassinngilaannga. Arpannermut nuannersumut Europami nittarsaassillunga ikiuukkusuppunga, Tyskeq oqarpoq.
Sermitsiaq.AG ACR 2016-mut peqataavoq - Arpannermit nutaarsiassanut qilanaalereersinnaavutit
ACR-mit nutaarsiassat kingullilit:
Arpattartoq tappiitsoq Sisimiuni 160 kilometerinut piareertoq
Sisoraatinik oqilaniuttartoq ajoquserami sæsonip sinnerani peqataasinnaajunnaarpoq