tunissut
Sisimiuni multibanetaassapput
Sisimiuni aasap kingorna multibanetaarnissamut Lions Clubip tunissuteqarnera qulakkeerinneqataavoq
Silami assigiinngitsunik timersorfiusinnaasoq Sisimiuni sananeqartussanngorpoq Sanaartornermik Ilinniarfiup illutaasa silataani sananeqassalluni. Suliniut Kalaallit Nunaanni Teknikkimik Ilinniarfimmit aallarnerneqarsimavoq.
Assigiinngitsunik timersorfiusinnaasup aamma multibanemik taaneqartup piviusunngortinnissaanut Lions Clup 150.000 koruuninik aningaasaliissuteqarpoq, timersorfissarlu Kalaallit Nunaanni Teknikkimik Ilinniarfimmi ilinniartut timersornerminni atortassavaat.
Taamaattoq suli nalunarallarpoq naqqa ivigaaraasaassanersoq imaluunniit asfaltiussanersoq.
Nalliuttorsiortoq
- Multibane ilinniarfiup kisimi iluaqutigissanngilaa. Uagut ullaakkut nalunaaqutaq arfineq pingasut ualikkullu sisamat akornanni atortassavarput. Tamatuma kingorna illoqarfimmiut atortarsinnaavaat aasakkulu silami assammik arsarfigineqarsinnaassalluni aamma, Kalaallit Nunaanni Teknikkimik Ilinniarfimmi timersornermi inuiaqatigiilerinermilu ilinniartitsisoq Peter Veddum oqarpoq.
Multibanep angissuserissavaa 16 x 32 meter, tassa assammik arsartarfittut angitigingajassalluni isuinilu tamaginni ajuuffilersuisoqassaaq. Timersorfissiaq taanna Sanaartornermik Ilinniarfiup illutaasa silataani sananeqassaaq.
- Naatsorsuutigaarput septemberip qaammataani piareersimassasoq, Peter Veddum oqarpoq.
Lions Club Sisimiuni ukiunik 25-nngortorsiornerminik malunnartitsiniaanermini qanittukkut aningaasanik agguaavoq tassanilu multibane-liornissaq 150.000 koruuninik tunissuteqarfigaat.
- Aningaasat qujarunnaqaat, taamaasilluta aamma basketball-imi ajuuffiit marluusinnaanngorput taamalu ajuuffiit aappaannik uanga paarsisariaarullunga, teknikkikkkut ilinniarnertuunngorniarfimmi rektori Poul V. B. Jensen qungujulaarluni oqarpoq.