ilinniartitaaneq
Sisimiuni meeqqat atuarfiat
Qeqqata Kommuniata sapaatip akunnerani matumani Sisimiuni meeqqat atuarfiat pillugu isumasioqatigiissitsinermigut, innuttaasunik ataatsimiisitsinermigut, pinngortitalerinermilu ilinniartitsisunut pikkorissaanermigut meeqqat atuarfiat immikkut samminiarpaa
Qeqqata Kommuniani kommunalbestyrelsi kommunimilu meeqqat atuarfiini pisortat aggustip 26-ani meeqqat atuarfiat pillugu isumasioqatigiissapput. Qeqqata Kommuniani meeqqat atuarfiata ineriartortinneqarnissaa eqqartorneqassaaq, soorluttaaq atuarfinnik aqutsineq, ulloq naallugu atuarfik, qarasaasiat iPads-illu kiisalu suiaassutsit assigiinngissusaat eqqartorneqassasut.
Meeqqat atuarfiat pillugu isumasioqatigiissitsinermi ilaatigut tuluit nunaanni atuarfiit ilaanni pisortaq Abdul Chohan saqqummiilluni atuakkanik atuinani atuarfimmi aqutsineq pillugu oqaluttuassaaq. Danmarks Pædagogiske Universitet-iminngaannit Frans Ørsted Andersen, Finland-imi ulloq naallugu atuarfik ingerlalluartoq, Qallunaat Nunaannilu meeqqat atuarfiini nukappiaqqat eqqissiviitsut qanoq sullinneqartarnersut oqaluttuassaaq.
Innuttaasunik ataatsimiisitsineq
Ataasinngornermit pingasunngorneq ilanngullugu, meeqqat atuarfiini pinngortitalerinermik ilinniartitsisunut Nutaaliorfik pikkorissaassaaq. Kalaallit Nunaanni meeqqat atuarfiini atuartut soqutiginninnerulersinniarlugit, taamaalillutillu pinngortitalerinermut pikkorinnerulernissaat pillugu Institut for Læring aamma Nutaaliorfik, Nordisk Ministerråd-imit tapiiffigineqarnermikkut pinngortitalerinermik ilinniartitseriaaseq ineriartortippaat.
Innuttaasunik ataatsimiisitsineq pissaaq kulturip illorsuani Taseralimmi nalunaaqutaq 19.30.