Sisimiuni kikkut ikuallaasuunersut suli ilisimaneqanngilaq

Sisimiuni aasap ingerlanerani arlaleriarluni ikuallatitsisoqarneranut tunngatillugu politiit inunnik arlalinnik oqaloqateqartareerput. Pasineqartunik suli tigusaqanngillat, aamma piffissami sivisuumi ikuallatitsisoqarnikuunngilaq.

Fahlip Aqqutaani Sisimiuni qui ikuallappoq marlunngornerup unnukkuani, ikualanerillu ilaatigut 15 meterisut takitigilertaraluarsimapput. Tassani inunnik ajoqqusertoqanngilaq. Qeqqani politiit pasitsappaat ikuallatitsoqaqattaartoq, allanimmi marlunnik ikuallattoqareerpoq. Misissuisoqareerneratigut paasineqarpoq qui ikuallatsinneqarsimasoq.

Marlunngornermi ikuallattoq ikuallattut pingajussaraat juulip 23-aniilli. Tassani biili nummerpladeqanngitsoq ikuallatsinneqarpoq Aqqartarfik blok 4-mi. Inunnik ajoqqusertoqanngilaq, ikuallatitsisullu aamma paasineqarnatik.

Qeqqani politiit ikuallannernut ilisimasalinnik inunnit ikiorneqaqqullutik tusarliussereerput.

- Inunnit arlalinnit saaffigineqareerpugut, taakku oqaloqatigereerpavut. Taakkununngali tunngatillugu suli tigusarisaqanngilagut, misissuinerit aamma suli ingerlanneqarput. Qujanartumilli ikuallatitsisoqaqqinnikuunngilaq, Qeqqani politikommisæri Johan Davidsen Sermitsiaq.AG-imut oqarpoq.

Ikuallannernut ilisimasallit imaluunniit arlaannik pasitsaassaqarunik Sisimiuni politiit saaffigineqarsinnaapput oqarasuaat 701322.