Sisimiut
Sisimiuni ikuallatitsisaqattaartoqarsimanissaa politiinit pasitsaanneqarpoq
Sisimiuni piffissap sivikitsup iluani ikuallattoqaqattaarpoq. Ikuallatitsisoqartarsimanissaa politiinit pasitsaanneqarpoq
Fahlip Aqqutaani Sisimiuni qui ikuallappoq marlunngornerup unnukkuani, ikualanerillu ilaatigut 15 meterisut takitigilertaraluarsimapput. Tassani inunnik ajoqqusertoqanngilaq. Qeqqani politiit pasitsappaat ikuallatitsoqaqattaartoq, allanimmi marlunnik ikuallattoqareerpoq.
Marlunngormat ikuallattoq ikuallattut pingajussaraat juulip 23-aniilli. Tassani biili nummerpladeqanngitsoq ikuallatsinneqarpoq Aqqartarfik blok 4-mi. Inunnik ajoqqusertoqanngilaq, ikuallatitsisullu aamma paasineqarnatik.
Pasinartoqartoq
Paamaap Kuua blok 9-mi aggustip aallaqqaataani aamma ikuallattoqarpoq. Nalaasaartarfik tassani ikuallatsinneqarpoq, kikkut aamma ikuallatitsisimanersut paasineqanngilaq.
Fahlip Aqqutaani ikuallattoq sakkortungaarmat 15 meterisut ikualaneq takitigileraluartoq Qeqqata politikommisæria Karl Jørgen Lennert nalunaarpoq.
- Ikuallannerit imminnut attuumassuteqartut pasitsaapparput. Taamaattumik angajoqqaat innuttaasullu kajumissaarpagut pasitsaassaqassagunik nalunaaqqullutik, Karl Jørgen Lennert oqarpoq.
Ikuallannernut ilisimasallit imaluunniit arlaannik pasitsaassaqarunik Sisimiuni politiit saaffigineqarsinnaapput oqarasuaat 701322.