Aalisarneq
Sisimiuni aalisartut umiarsuarnik tunitsivinnik kissaateqarput
Sisimiut eqqaa saarullippassuaqarpoq, kisianni tunisassiorsinnaassuseq annikippallaarpoq, aalisartut isumaqarput. Kim Kielsenip atukkanik misissuinissamut kajumissaarneqarpoq.
- Sisimiut eqqaani kangerlunni saarullippassuit piulereerput. Ajoraluartumilli Sisimiuni saarullinnik tunisassiorfiup tigooraasinnaanera annikippallaarpoq.
Aalisartut Naalakkersuisunut taama oqariartuuteqarput. Tassami tunitsivinni atugassarititaasut aalisartut pakatsinaraat.
Neriorsuutini timitalinngikkai
- Suliffeqarfiit Sisimiuni angerlarsimaffeqartut umiarsuarnik tunitsiviliinissamut aalisarnermut naalakkersuisoq (Hans Enoksen, aaqq.) qinnuteqarfigigaluarpaat, kisianni kissaaterput tusaaneqanngilaq, aalisartut pakatsisimaartut taama allagaqarput.
Aalisartummi naapertorlugit umiarsuarmik tunitsiveqalernissamut Hans Enoksenimit (PN) neriorsorneqarsimapput.
Naalakkersuisunut piumasaqaat
- Aalisarnermut naalakkersuisoq neriorsuutiminik timitaliisinnaanngippat, Naalakkersuisut siulittaasuat Kim Kielsen Sisimiuni aalisartunut nassuiaajartornissaa kissaaatigaarput, aalisartut erseqqissaapput.
Saarullinniarnerup uneqattaartannginnissaa aalisartut kissaatigaat.
- Taamaattumik aalisartunut tamanut iluaqutaasussamik piaartumik umiarsualiisoqarnissaanut Naalakkersuisut akuersinissaat piumasaraarput.