Sisimiut
Sisimiuni aalisartut aalisaqqilerput
Sisimiuni aalisartut saarullinniaqqilerput, sapaatip akunnera ataaseq akerliussutsimik takutitsereerlutik. Taamatut nalunaarpoq illoqarfimmi aalisartut piniartullu peqatigiiffiat SAPP
Sisimiuni aalisartut aalisaqqilerput, Sisimiuni tunisinissamut periarfissat killeqarnerat naammaginagu sapaatip akunnera ataaseq akerliussutsimik takutitsillutik uninngareersimallutik. Illoqarfimmi aalisartut piniartullu peqatigiiffiat isumaqarpoq maalaarutitik tusaaniarneqarsimasut pissutsillu maanna ilorraap tungaanut aallartut.
Aalisartut piniartullu peqatigiiffianni siulersuisunut ilaasortaq Leif Fontaine ippassaq KNR-mut oqaluttuarpoq umiarsualivimmik matusiniarnertik ataasinngormat kinguartillugu. Tamatumunnga pissutaavoq Inatsisartut aalisarnermut ataatsimiititaliaata piumasarimmagu Naalakkersuisut tunitsivissanut amerlanerusunut peqqussusiussasut.
– Sisimiuni aalisartut Inatsisartut aalisarnermut ataatsimiititaliaannit tamakkiisumik ilalerneqarnertik innuttaasunillu tapersersorluarneqarsimanertik nuannaarutigaat, Leif Fontaine tusagassiorfinnut nalunaarummi allappoq.
Aalisakkanik suliffissuaq nutaaq
Sisimiuni aalisartut paasissutissiissutigerusuppaat aalisarnermik ingerlatsivik namminersortoq sumiiffimmi aalisartut suleqatigalugit aalisakkanik suliffissuarmik pilersitsinissamik pilersaaruteqartoq, tamanna Sisimiuni akerliussutsimik takutitsinermi oqaatigineqarpoq.
– Taamaasilluni siunissami qaninnerpaami aalisakkanik tunisinermi unammillernermik pilersitsisoqassaaq, Leif Fontaine SAPP-meersoq allappoq.