vildt
Sisimiormiu nataarnarujussuarmik pisaqarpoq
Edvard Petrussen Sisimiuneersoq nataarnamik tunisaqarsimavoq saarulliit karsit aqqaneq marluk oqimaaqataannik
Sisimiuni Royal Greenlandip suliffissuanut nataarnaq 108 kilo tunineqarsimavoq. Tassannga pisaqartoq Edvard Petrussen taama angitigisunik siornatigut pisaqartareersimavoq.
Ulluinnarsiutaanngilaq aalisakkat pisaqartuminnit anginerit tulaanneqartarnerat. Taamatulli sapaatip akunnerata naanerani kingullermi Sisimiuni pisoqarpoq Edvard Josefsen nataarnamik 108 kilomik oqimaassusilimmik Royal Greenlandip suliffissuanut tulaassimmat.
Atuaruk: Nataarnarujussuaq pisarigaa
- Nataarnamik taama angitigisumik aatsaat pisaqalinngilanga. Siornatigummi taama angitigisut sisamat ataatsikkut Kangerlussuup paavani pisarinikuuakka. Taamaammat taama angitigisumik pisaqarneq takornatarinngilara, Edvard Petrussen Royal Greenlandip nittartagaanut oqarpoq.
Aalisagaq pikippoq
Edvard Petrussen pilersaarsimagaluarpoq pisarsuani, Royal Greenlandip naatsorsuinera malillugu saarulliit karsit aqqaneq marluk oqimaaqataat, Kalaaliaqqami tuniniarniarlugu. Sapaatip akunneratali naanerimmagu kiallunilu Edvard Petrussen aalajangersimavoq Royal Greenlandip suliffissuanut tuniniarlugu.
Aalisagarsuullu qarsorsamik kiisinerata kingorna qaqinnissaa imaannaasimanngilaq.
- Oqimaannerusunik pisaqaraangama sipilera ikiorsiuttarakku amuarniarnera ajornartorsiutaasimanngilaq. Qarsorsaajangajappungali nataarnaq aallariataaraluarmat, Edvard Pettussen oqaluttuarpoq.
Nataarnaq 300 kilo angullugu oqimaassuseqalersinnaavoq 60-nilu ukioqalersinnaalluni.