ho ho ho
Sisimiormiu juullip inuata ikiortigaa
Illumi ittuusup it-millu ineriartortitsisartup kalaallit juullip inuat illersorlugu qupperniliorpoq applikationiliorlunilu
Ulluinnarni ilaqutariinni ittuuvoq ulapittoq kommunimilu it-mik siunnersortitut sulisoq. Unnuakkut nissiaqqanik ikiuuttuusarpoq, nammineq akilikkaminik kalaallit juullip inuanik Intternettikkut puigutsaaliuisitsisoq.
Nittartakkat arlallit
Sisimiuni Ulurik Motzfeldt-Skovgaardip nittartakkat santa.gl aamma santa-greenland.com ingerlatarai. Tassani ilaatigut titartaganngorlugu takusinnaavat juullip inuta Air Greenlandip helikopteria AS-350 saneqqukkaa, Kalaallit Nunaanni juullip inuanit oqaatsit assigiinngitsut arfineq-marluk atorlugit e-mailikkut inuulluaqqussutisisinnaavutit imaluunniit digitalimik aaqqissuulluagaq atorlugu juullip inua sianerfigisinnaavat.
Kalaallit Nunaannit
Ulrik Morzfeldt-Skovgaardip quppernerit nittartakkat ingerlatilerpai 2009-mi ukiut aappassaa tulleriisiinnarlugu santa.gl uninngaannarmat. Taamanikkut santa-greenland.com sanavaa, naqissuserniarlugu juullip inua Kalaallit Nunaanneersuusoq. Santa.gl atorneruummat qaammami kingullermi site taanna tiguvaa.
– Nunat allamiut ingerlatsiviinit pisiarineqarnissaa pinngitsoorusussimavara. Finlandimi juullip inua aamma akiliisinnaajunnaarsimagaluartoq isumaqarpunga pingaaruteqartoq takutissallugu juullip inua Kalaallit Nunaanneersuusoq, Ulrik Motzfeldt-Skovgaard erseqqissaavoq.
Meeqqat nuannarisaat
Quppernerit nittartakkat ineriartortinnerat ingerlannerallu piffissaajarnarlunilu akeqarpoq. Sapaatip akunnerani kingullermi Ulrik Motzfeldt-Skovgaardip "Juullip inuanit sianerfigitinneq" naammassivaa, sianertarnissamullu aningaasartuutit matussutissinniarlugit sianerfigitinneq 5 dollarsinik akeqarpoq. Taannalu kiffartuussivimmi akeqartutuaavoq.
Sisimiuni nissiaqqat ikiortaata suliani akissarsiassamisut naammagaa.
Nuannaarneq
– Angajoqqaat tamarmik takusarpaat meeqqat qanoq nuannaartigisartut juulli juullillu inua oqaluuserineqaraangata. "Juullip inuanit allakkat" aamma "Juullip inuanit sianerfigitinneq" nuannaarutaasinnaappata suliat namminerminni naleqarput, Ulrik Motzfeldt-Skovgaard oqarpoq.
Santa Greenland Facebookimi quppernermi malunnaavigisinnaavat uani:
https://www.facebook.om/santagreenland/