Nuuk
SIS-ip isumasioqatigiisitsinermini aatsaat taama peqataasoqartigaaq
Siumup inuusuttortai illoqarfinnit nunaqarfinniillu 26-nit peqataasoqartumik Nuummi isumasioqatigeeqqammerput
Siumup Inuusuttunut Suleqatigiiffia, SIS, arfininngornermit ullumi marlunngornerup tungaanut Nuummi isumasioqatigiipput, nuna tamakkerlugu Siumup Inuusuttunut Suleqatigiiffiani immikkoortortaqarfinni siulersuisut ilaasortallu peqataallutik.
Isumasioqatigiinneq kattuffilerinermik pikkorissarnertalik illoqarfinniit nunaqarfinniillu 26-nit peqataaffigineqarpoq. Isumasioqatigiinnermut peqataasut aatsaat taama amerlatigipput.
Isumasioqatigiinneq aallarnerlugu SIS-imi siulersuisuunerit peqataasunut tamanut avataaniillu tusarnaarianut tikilluaqqusinermik arfininngornermi ammaapput, SIS-ip ukiuni tulliuttuni politikkianik anguniagaanillu saqqummiussillutik.
Ataasinngornermi Siumup Naalakkersuisuutitai saqqummiipput. Naalakkersuisuni ilaasortat saqqummiinerat iluatsillugu isumasioqatigiittut ataatsimoorlutik sunniuteqaqataanissartik siunertaralugu Naalakkersuisunut assigiinngitsunik oqariartuuteqarput.
- Isumasioqatigiinneq oqallinnertalimmik ingerlanneqarpoq. Peqataasut ataatsimoorullugu ilaatigut tuluttut oqaatsit atorneqarnerunissaat aatsitassarsiornermilu nunaqavissut sulisorineqartarnissaat oqariartuutigaat, SIS-imi siulittaasoq Piitannguaq Møller SIS-mi siulersuisut sinnerlugit oqarpoq.