sipaarniuteqarnerit
Sipaarniarneq timersornerup quarsaarutigaa
Naalakkersuisut timersorneq 600.000 koruuninik sipaarfiginiarpaat. Tamanna AWG-mut piareersarnermik eqquisinnaasoq GIF-ip siulittaasua oqarpoq. GIF ukiuni kingullerni millionilinnik sinneqartooruteqarsimavoq
Meeqqat inuusuttullu namminerlu piumassutsiminnik ikiuuttartut Naalakkersuisut sipaarniuteqarnissamik siunnersuutaannit piginnaanngorsarnerat sakkortuumik eqqoarneqassapput.
Taamatut qisuariarpoq timersoqatigiit kattuffianni GIF-imi siulittaasoq Nuka Kleemann, 2015-imut aningaasanut inatsisissatut siunnersuummi sipaarutissat, aningaasaqarnermut Naalakkersuisup Anda Uldumip saqqummiussai, qimeerlooreerlugit. Aningaasanut inatsisikkut 50 millioner koruuninik sipaarniuteqartoqarpoq, GIF-illu aningaasaliissutaasartunit 8 millioner koruuningajannit 600.000 koruunit annaasussanngorpai.
Ilinniartitaanermut, kulturimut, ilisimatusarnermut ilageeqarnermullu Naalakkersuisup Nivi Olsenip timersornermut sipaarniuteqarnissaq illersorpaa. GIF naatsorsuutimigut sinneqartooruteqarpoq.
Tupaallanngitsumik sipaarniarfigineqarnini GIF-ip ilalernartinngilaa.
– 50 millioner koruuninit 600.000 koruunit amerlarpasinngeqaat. GIF-imulli aningaasarpassuupput. Sipaarniutit meeqqanik inuusuttunillu sulinitsinni malunniutissapput. Aappaagumullu Arctic Winter Gamesimut timersornikkut piareersarneq eqqorneqassaaq, Nuka Kleemann oqarpoq.
Oqaluttuaq tamaat AG-mi sapaatip akunnerani saqqummersumi atuaruk. Ataani pisiarisinnaavat.