Nuummi GU-mut sioorasaarineq
Sioorasaarisoq unnerluutigineqartoq pinngitsaalisamik unitsinneqarpoq
Ullumi aalajangiunneqarpoq angut sioorasaarisoq, sapaatip akunnerata naanerani Nuummi pissangatitsisoq, ulluni 25-ni tigummineqarallassasoq
Ippassaq politiit pinartoqartillugu akulerutsittagaasa Nuummi Kongevejimi inissiami matu aserorpaat tassanilu sioorasaarisutut pasineqartoq tigusaralugu - angut 28-nik ukiulik, siusinnerusukkut tarnimigut ajornartorsiuteqartarsimasoq.
Aqaguani Sermitsiaq.AG-p politeeqarfimmi pigaartoq Mads Lynge oqaloqatigaa.
Unnerluutigineqartoq maanna qanoq ippa?
– Tarnimikkut nappaatilinnut immikkoortoqarfimmut A1-imut pinngitsaalisamik unitsinneqarpoq. Timaatigut pissusaa eqqarsaatigalugu isumaqarpunga ajunngitsoq.
Qaqugu eqqartuussisumut sassartinneqassava, qanorlu unnerluutigissavisiuk?
– Nalunaaqutaq 14 inatsisit tunngaviusut malillugit killisiorneqassaaq. Unnerluutigissavarput ilinniarnertuunngorniarfimmi ilinniartitsisunik ilinniartunilu sioorasaarisimasutut toqutseriarsimasutullu.
Piffissami kingullermi arlaleriarluni pinartunik sioorasaarisoqartarsimavoq, ilaatigut ukiarmi aamma namminersorlutik oqartussanut. Pisimasut assigiissuteqarnerat takusinnaavisiuk?
– Assigiissuteqarnerannik maannangaaq takusaqarsinnaanngilagut. Inuit taakku imminnut attuumassuteqanngillat. Sioorasaarinerit tamaassa pimooruttarpavut nalilertarlugillu, ilisimasavullu aallaavigalugit iliuuseqartarluta. Ilatsiinnarnagit tamatigut qisuariarfigisassavagut.
Sioorasaarinernut taamaattunut siusinnerusumit sakkortunerusumik qisuariartalerpisi?
– Tamanna akiuminaatsippara. Kisiannili aap, piffissami sivikitsumi politiit annertuunik iliuuseqartarsimapput, imaanngilarli periutsivut allanngortissimagivut. Sioorasaarinerit tamarmik nalilerneqarlutillu pimoorunneqartarput, pingaartumillu sioorasaarinerni naalakkersuisut (Naalakkersuisut aamma namminersorlutik oqartussat) atuarfiillu ilaatinneqaraangata soorunami pimoorutissavagut.
Arlallit isumaqarput pisumasumi matumani politiit sakkortunerusumik qisuariarsimasut, nunami sumiiffinni allani taamaattoqartarneraninngarnit. Tamakkua qanoq akissavigit?
– Pisimasoq manna sinerissami pisimasuuppat taamatorpiaq qisuariarsimassagaluarpugut. Imaanniartussaavormi sumiluunniit arlaannik pisoqartillugu assigiissumik iliuuseqarsinnaassaagut, Nuummi Politiini pigaartoq Mads Lynge akivoq.
Ulluni 25-ni tigummigallarneqarpoq
Inatsisit tunngaviusut malillugit killisiuinerup kinguninngua arfininngormat ualikkut nalunaaqutaq 14 politiit unnerluussisuunerat Morten Nielsen tusagassiorfinnut nalunaaruteqarpoq, tassani allassimalluni angut 28-nik ukiulik nammineq eqqartuussivimmi najuutinngitsoq, taanna A1-imut pinngitsaalisamik unitsinneqarsimammat.
Eqqartuussivik aalajangiivoq angut ulluni 25-ni tigummineqarallassasoq.
Eqqartuussivimmut sassartinneqaqqissaaq
Killisiuinermi 28-nik ukiulik najuutinngimmat eqqartuussivimmut sassarteqqinneqassaaq ´peqqissusia malillugu pisinnaalerpat, kingusinnerpaamik ulloq unnuarlu qaangiutsinnagu´.