Naalakkersuisooqatigiilersut
Sinerissap qanittuani aalisartut piniartullu: Pisassiissutit malunnaatilimmik qaffanneqarlik
Sinerissap qanittuani aalisartut piniartullu kattuffiata Naalakkersuisooqatigiinnissamut isumaqatigiissut pisassaannik ilasilaarnissamulluunniit pisussaaffiliisumik imaqanngimmat pakatsissutigaat
Kalaallit Nunaanni aalisartut piniartullu kattuffiat, KNAPK, Inatsisartuni ilaasortaalersunut oqariartuutigaat aalisarnermut inatsisissaq naammassineqartariaqartoq Sermitsiaq.AG-mit sapaatip akunnera kingulleq allaaserineqarpoq.
Sinerissap Qanittuani Aalisartut Piniartullu Kattuffia tusagassiutinut nalunaaruteqarpoq Naalakkersuisooqatigiinnissamut isumaqatigiissut pakatsissutigalugu, tassanimi pisassiissutit amerlineqarnissaannik allaqqasoqanngilaq.
Taamaattorli aalisarnermut piniarnermullu Naalakkersuisunngorumaartussaq aalisakkanik piniakkanillu pisassiissutit ilaneqarnissaat piumassuseqarfigissagaa neriuutigisariaqarfigineqarpoq.
- Aalisakkanik nalittorsaaneq isumaqatigiissummi ilaavoq kisiannili toqqaannartumik sinerissap qanittuani aalisartunut ilaqutaannullu iluaqusiisinnaanngilaq, tamatumani aalisartumut aalisakkap pisiarereernerata kingorna nalittorsaanissaq siunertarineqartoq isumaqatigiissumi ersarimmat, Sinerissap Qanittuani Aalisartut Piniartullu Kattuffiata siulittaasua Erik Lange tusagassiutinut nalunaarummi oqarpoq.
Pisassiissutit qaffanneqarnissaat
Sinerissap Qanittuani Aalisartut Piniartullu Kattuffiata piniakkanik aalisakkanillu pisassiissutaasartunik malunnaatilimmik ilasisoqarnissaa neriuutigaa.
- Soorunami piujuaannartitsineq illersortariaqarpoq kisianni piujuaanartitsineq ilaqutariit illuminni qamitaanerannik, anisitaasarnerannilluunniit ullumikkut atukkatsinnik kinguneqartilereersimasarput, pisassiissutinik minnerpaaffiliiniarutta minnerpaamik qaangeqqaartariaqarparput. Ullumikkummi piniartunut aalisartunullu pisassiissutit ima amingartingaat allaat tamaannga killissimalluta, Erik Lange oqarpoq, nangillunilu:
- Taamaattumik sinerissap qanittuani aalisartut piniartullu atungaannik iluarsartuussinissamik Naalakkersuisut suliniuteqarnissaanni suleqataanissarput aqqutissiueqataanissarpullu qilanaaralugu Naalakkersuisooqatigiilernissamik isumaqatigiittut Inatsisartunullu qiningaasut tamaasa pilluaqqullugit sulilluarnissaanik kissaappagut.