qinersineq 2014

Sinerissap qanittuani aalisarneq

Henrik Fleischer, Sisimiuni Partii Naleraq tunuliaqutaralugu qinigassanngortittoq isumaqarpoq, sinerissamut qanittumi raajarniat raajartassat 50 procentii pisassagaat

Havn, Sisimiut, kutter, trawler
Kutterit sinerissamut qanittumi aalisartut amerlanerusunik raajartassinneqassapput.

Sinerissap qanittuani raajarniarneq makiteqqinneqartariaqarput, taamatut isumaqarpoq Partii Naleraq tunuliaqutaralugu Sisimiuni qinigassanngortittoq Henrik Fleischer.

– Tamanna pisinnaanngippat inuit ataasiakkaat pisortallu ingerlatsivii suliffissanik inangersimaarinninnerat isiginngitsuusaaginnarneqarluni akuersaaginnarneqassaaq, sinerissamut qanittumi aalisartut aningaasarsiornissaannik periarfissinnagit, Henrik Fleischer oqarpoq.

– Suliffissaqarniarneq aningaasarsiornerlu patajaallisarneqassappata, Royal Greenland-ip aalisarnikkut ingerlatsivii innuttaasut nammineerlutik tigusariaqarpaat ingerlatilerlugillu, taanna naliliivoq.

– Taamaattumik sinerissap qanittuani aalisartut amerlanerusunik aalisagartassinneqarnissaannik (50/50) KNAPK-p tusagassaqarfitsigut ippassaq oqariartuuteqarluni siunnersuuteqarnera taperserpara. Isumaqarama sinerissap qanittuani aalisartut ukiorpassuarni ilungersulussinnarlutik inuutissarsiorsinnaajunnaarsimasut aalisarnikkut nutaamik aaqqissuussivigineqarlutik makiteqqinneqartariaqartut, Henrik Fleischer tikkuaavoq.

Powered by Labrador CMS