2015-imut aningaasanut inatsit
Sinerissamut qanittumi aalisarneq sakkortuumik eqqorneqassaaq
Naalakkersuisut 2015-imut aningaasanut inatsisissatut siunnersuutaat KNAPK-p sakkortuumik isornartorsiorpaa
Aalisarnerup ineriartortinnissaanut immikkoortitat 20 millioner koruunit peersinneqarnerisigut sinerissamut qanittumi aalisarneq sakkortuumik eqqorneqassaaq. Aningaasat tamakkua sinerissamut qanittumi aalisartut angallatinik nutaanik pisinissaminnut atortarpaat, KNAPK-p siulittaasua Henrik Sandgreen Sermitsiaq.AG-mut oqarpoq.
– Oqaannarsinnaavunga Naalakkersuisut paatsiveeruttut. Naalakkersuisut ajunngivissumik oqaloqatigisimavagut paasisimavarpullu sinerissamut qanittumi aalisarneq tapersersorniaraat. Naalakkersuisut paasitinneqarsimapput sinerissamut qanittumi aalisartut arlallit ineriartortitsinermut aningaasat atorlugit umiatsiaaqqamik nutaamik pisinissartik pilersaarutigigaat. Taamaattumik Aningaasanut Inatsit tupaallaatigisorujussuuvara, Henrik Sandgreen oqarpoq.
Aalisartut piniartullu kattuffiata siulittaasua isumaqarpoq Naalakkersuisut nalunaarutigisimasamik akerlerluinnaanik iliuuseqarnialersut.
– Ilami tupannaqaaq. Aalisarnerup ineriartortinnissaanut immikkoortitat peerniaannanngilaat, aamma sinerissamut qanittumi aalisartut nutaamik akitsuusernialerpaat. Tamanna eqqortuusinnaanngilaq, Henrik Sandgreen oqarpoq.
KNAPK-p siulittaasuata oqaatigaa aalisarnermut piniarnermullu Naalakkersuisup Finn Karlsenip, Siumut, pilersaarutigineqartutut septembarip 5-anni ataatsimeeqatiginissaa kattuffiup qilanaarigaa.
Nunami tamarmi sinerissamut qanittumi aalisartut 2.400-t missaanniittut KNAPK-p nalunaarsorsimavai.