Aalisarneq
Sinerissami tunitsivinni qerititsiviit annertusarneqarallarnavianngitsut
Qerititsivinni inissaaleqineq assartuinermilu ajornartorsiuteqarneq sinerisissami aalisarneq ingerlanerlutsiinnarsinnaavaa
Nunaqarfiit qerititsivilerneqassanngikkallarput. Tamanna Hans Aronsenimut (IA) akissuteqaammi allassimavoq. Taassuma tulaasuiffiulluartuni tunitsivitsigut ulikkaartuukulaarfiusuni immikkut usinik assartuussinermi aaqqiissuteqartoqarsinnaanera apeqqutigisimavaa.
Misiligut
Ukiakkut ataatsimiinnermi misiligummik qerititsivilersuinissamut 7,5 mio. koruuninik aningaasaliissoqarnissaa aalajangiunneqarsimavoq. Ingerlaannarli pilersitsisoqarsinnaangitsoq, Kommuninut, Nunaqarfinnut Attaveqaqatigiinnermullu Naalakkersuisup Erik Jensenip (S) akissuteqaataani allassimavoq.
- Immikkoortup suliarineqarnerani Naalakkersuisut nassuiaammik, nunaqarfinni qerititsivinnik misiligummik pilersuinissamut annertusititsinissamullu qanoq iliorlutik naapertuunnerpaamik katiterisinnaanerannut atulersitsisinnaanerannullu
allaaserinniffiusumik saqqummiussinissamut peqquneqassasut aalajangiunneqarpoq, taanna akissuteqarluni allappoq.
- Nassuiaat 2018-imi ukiakkut ataatsimiinnissaq sioqqullugu Inatsisartunut agguaanneqassaaq, taamaalillunilu nassuiaammi inerniliissutaasut 2019-imut aningaasanut inatsisissatut siunnersuutip suliarineqarneranut ilanngunneqarsinnaassapput.
Tassunga atatillugu ukioq manna qinersisoqarnissaa eqqaamaneqassaaq, tamannalu suliap ingerlanneqarneranut aamma kinguarsaataasinnaavoq.
Kangaatsiami aalisarluartoqartoq
Ajornartorsiut sumiiffinni arlalinni ajornartorsiutigineqarpoq, aalisakkammi pisarineqartarnerisut sukkatigisumik RAL-i ornigussinnaaneq ajorpoq. Tamanna Kangaatsiami ajornartorsiutigineqarpoq, tassani aalisakkat tunisat qaffariaateqangaatsiarsimapput. Tallimanngormat oqaluttuaraarput sumiiffimmi tunisat 2017-miit 400 procentimik qaffariaateqarsimasut. Tassani Royal Greenlandi saarulliit nerpiinik tunisassiornermi atortunik 2015-imi ikkussuisimavoq.
- Naak Royal Arctic Linep usinik assartuisarnera ingerlaavartumik ingerlanneqartaraluartoq assartuisoqartillugu qerisuusivigut tamakkiisumik imaarneqarneq ajorput.Taamaattoqarnerata nassataraa qerisuusiviit ulikaaraangata tunisinerit matusariaqartarnerat taamatuttaaq piffissami sivikitsumi sulisut angerlartiinnartariaqartarput, Royal Greenlandimi tunisassialerinermi ingerlatsisoq, Sten Sørensen suliffeqarfiup nittartagaanut oqarpoq.
Aamma atuaruk: Kangaatsiap eqqaani aalisakkat tunisat qaffariaateqangaatsiartut
- Sulissutigineqartuartoq
Sinerissami inoqarfinni aalisakkanik tulaassuiffiulluartuni usinik assartuussineq pitsanngorsaavigineqassanersoq Hans Aronsenip (IA) ilanngullugu apeqqutigaa. Tamannalu annertunerusumik pisussaaffiginagu Erik Jensenip akissuteqarfigaa.
- Royal Arctic Line-mut isumaqatigiissutitsinni sinaakkusiussat iluanni pitsanngorsaanissaq Naalakkersuisut sulissutigiuarpaat.
- Usinik assartuussisarneq ukiut tamaasa angalanissanut pilersaarutinit pingaarnernit aqunneqartarpoq. Angalanissanut
pilersaarutit pingaarnerit atuutilernissaminnut ukiakkut akuerineqartarput. Ukiup tullianut angalanissanut pilersaarutit pingaarnerit suliarineqarnerini ukiumi ataatsimi usit amerlassutsimikkut allannguuteqartarnerat isummersuutinut ilaatinneqartarput, akissutigineqarpoq.