Skip to main content

Simon parteeqamminut akerliliisoq

Siumuminngaanneersoq Anders Olsen Attaveqaqatigiinnermut Naalakkersuisoq Simon Simonsen Kujataani angallannermut pissutsit “sammiveqanngitsut” aaqqiissuteqarfigisimanngimmagit sakkortuumik isornartorsiorpaa. Simon Simonsenilu tamatumunnga akerliliivoq.

Anders Olsenip Kujataaninngaanneersup, Sermitsiaq aviisimi 27. juulimi saqqummertumi, Simon Simonsenip kujataani angallannermut pissutsit “sammiveqanngitsut” aaqqiissuteqarfigisimanngimmagit, sakkortuumik isornartorsiuivoq. Taassuma piumasaraa akisussaasuulluni oqartussaq isumaqatigiissutinik atorunnaarsitsissasoq.

Ilanngussami takisuumii Naalakkersuisut nittartagaannut  lineqarsimasumi, Anders Olsenip kiffartuussinissamik isumaqatigiissutit atorunnaarsinneqarnissaannik kaammattuuteqarnera, Simon Simonsenip eqqumiigivaa.

Uppernassuseq

- Nunami politikeritut akisussaasutut Naalakkersuisut Inatsisartullu uppernartumik akisussaassuseqartumillu sulinissaasa qulakkeerneqarnissaa pisussaaffigaarput. Imaassinnaavoq kiffartuussinermut isumaqatigiissutit atuuttut Anders Olsenip kissaatigisaanut naapertuutinngitsut, kisiannili imaanngilaq kiffartuussinermut isumaqatigiissutit Nunap Karsianut kinguneqanngitsumik taamaatiinnarneqarsinnaasut, Simon Simonsen allappoq.

- Anders Olsen ukiorpassuarni Inatsisartuni ilaasortaasimasutut maanna kiffartuussinermut isumaqatigiissutaasunut sinaakkutissanik tunngavigineqartunik pilersitseqataasimavoq. Imaappormi – Naalakkersuisut taamaallaat Aningaasanut Inatsimmi aningaasaliissutsini periarfissiissutigineqartut malillugit kiffartuussisinnaapput, Simon Simonsen, “Aningaasanut inatsisissamut isumaqatiginninniarnermi pisussami Anders Olsenip Inatsisartunilu ilaasortat sinneri sinaakkutissat taakku allanngortissallugit periarfissaqartut”, tikkuarlugu erseqqissaavoq.
 

Nunap innuttaasui salliutinneqartut

Simon Simonsenip ilanngutassiamini tikkuarpaa, Nunap Karsiata aningaasaataasa pingaartumik nunatsinni innuttaasunut atorneqarnissaat pingaartinneqartoq, kinguneraalu takornariat tikeraallu, Kalaallit Nunaanni najugaqanngitsut bilitsinut annaasaat inissinneqarnermullu aningaasartuutaasa matussuserneqarnissaannut aaqqissuussinermut ilaatinneqannginnerat.

- Takornariatut angalagaanni, siumoortumik angalanermut sillimmasiissuteqarsimanissap isumannaarnissaa pingaaruteqarpoq. Angalasup nammineerluni tamanna akisussaaffigivaa – Naalakkersuisunit akisussaaffigineqanngilaq. Aamma kalaallisut innuttaassusillit nunanut allanut angalagaangata taamaappoq, Simon Simonsen oqarpoq.

Suleqatigiissitamik pilersitsineq

Ilanngullugu innersuussutigaa, suleqatigiissitamik pissutsinik atuuttunik qanoq pitsanngorsaasoqarsinnaaneranik misissuitinneqartussanik pilersitsisimalluni.

- Maannakkut suleqatigiissitaliamik pitsanngorsaataasussanik siunnersuuteqartussamik pilersitsisoqarnikuuvoq, Simon Simonsen nassuiaavoq ilanngussaminilu parteeqamminut ima naggasiilluni:

- Aningaasanut inatsimmi, Inatsisartut Naalakkersuisunut sinaakkusiussaasa iluanni aalajangiussat aalajangiusimaannarnissaat aammalu pitsannguinissamik suliaqartuarnissaq uanga politikkeraara.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER