Simon Olsen toquvoq

– Ikinnguterput asasarput Simon Olsen toquvoq.
Simon Olaen, arfininngormat toqusoq pillugu Naalakkersuisut siulittaasuat Aleqa Hammond, Siumut, taamatut allappoq.
Nangillunilu:
´Kammalaaterput ikinnguterpullu ataqqinartoq, naalakkersuisunut ilaasortaasimasoq Sisimiullu Kommuniani borgmesteriusimasoq Simon ´Aqqalu´ Olsen, arfininngormat juunip 8-anni toquvoq.
Aqqalu angut nukittuujusimavoq inuit inuuniarnermi atugarissaarnissaannik pingaartitsisoq tamaviaarlunilu suliniutiginnittoq, aammalu ataqatigiinnerup attatiinnarnissaanik sorsuutiginnittoq. Aqqalu inuugallarnermini nuannaarnermik siammarsaasuusimavoq, aamma Naalakkersuisut suliassaannut tamaviaarnartunut atatillugu, taamaasilluni pissutsit isikkuminnit naammassiuminarpasinnerulersillugit.
Aqqaluup toquneratigut Siumut innuttaasullu inuk malunnaatilik nukittoorlu annaavaat. Aqqaluup ilaqutai ikinngutaalu qamannga pisumik misiginneqatigaavut. Tamatta Aqqalu eqqaamallugulu maqaasissavarput.
Simon ´Aqqalu´ Olsenip eqqaaneqarnera ataqqinartuuli´.