Simon napparsimasoq: Vittu Oslomit angerlapallappoq
Attaveqaqatigiinnermut naalakkersuisoq Simon Simonsen stressernini pissutigalugu sapaatip-akunnerini sisamani napparsimanermik nalunaaruteqarpoq. Mittarfiliortiternissamut pilersaarut Inatsisartuni saqqummiussinnaannginneranik, tamanna kinguneqarpoq.
OBS: Nutaanik paasissutissalerlugu nal. 13.45 nutarterneqarpoq.
Simon Simonsenip politikkikkut sulinini sapaatip-akunnerini sisamani unitsittariaqaraa nakorsaata innersuussutigisimavaa.
Napparsimanermik nalunaaruteqarnerup Naalakkersuisut siulittaasuat Kim Kielsen unammilligassaqartippaa, mittarfiliortiternissamut pilersaarut annertooq minnerunngitsumik Simon Simonsenimit akisussaaffigineqarmat.
Vittu angerlapallappoq
Aningaasaqarnermut naalakkersuisoq Vittus Qujaukitsoq Nunani Avannarlerni Siunnersuisoqatigiit Norgemi illoqarfiit pingaarnersaanni Oslomi ataatsimiinnerannit erngertumik angerlartinneqartoq, Sermitsiaq.AG-p paasivaa.
Tassami mittarfiliortiternissamut pilersaarutip suliarineqarnerani Vittus Qujaukitsoq Naalakkersuisuni siuttuunissamut suliakkerneqarsimavoq.
Simon Simonsenip napparsimalluni sulinngiffeqartariaqarluni siulittaasuni marlunngornermi ullaakkut nalunaarfigisariaqarsimavaa.
Napparsimalluni sulinngiffeqarnerup sivisussusaanik Simon Simonsenip Kalaallit Nunaanni sanaartornermut inatsisit pingaarnersaasa ilaat saqqummiussinnaassanngilaa. Mittarfiliortiternissamut pilersaarutit Inatsisartuni inarutaasumik pingajussaaneerneqarnissaat novembarip 15-annut ullulerneqarnikuuvoq.
Ullumi ullup ingerlanerani nersornaasiisoqarnissaani Nunani Avannarlerni Siunnersuisoqatigiit ataatsimiinneranni Vittus Qujaukitsoq erngertumik ingerlasariaqarsimavoq. Akissarsititsisoqarnerata nalaani Inatsisartunut siulittaasoq, Vivian Motzfeldt, politikkikkut qullersanut tunngatillugu taamaalilluni kisimiilluni Kalaallit Nunaannut sinniisuussaaq.