Simon Lyngep inuussutissarsiutini aarleraa: Assamigut talerperlikkut ajoquserujussuartoq
Nipilersortartup assami aalallorissusaa uterteqqinngitsoornissaa ernumassutigaa. Maanna ikioqquvoq.
Sapaatip-akunnerata siuliani pingasunngornermi pisoq erinarsortartup nipilersortartullu Simon Lyngep sinnatumilumi ajornersaatut oqaatigaa.
- Igaffimmi savimmik ipittorujussuarmik ajutoornerninni inussakka pingasut kilerpakka. Naggussama noqarutai marluk, sianitikka aamma taqarsuama mikileqqannilu taqarsuama kilerpakka, kiisalu eqeqqunni naggussama noqarutaa minnerpaamik ataaseq, taanna Facebookimi allappoq.
- Seattlemi ippassaq immikkut assannik ilisimasalimmiippunga, assamalu talerpilliup aqulluarsinnaanerata tigoqqinnissaanut periarfissaq mikisuararsuuvoq.
- Kikkut tamarmik nipilersortunga takunnissimasut tusaasimasulluunniit nipilersukkama assakka atorlugit kitaarertarnera aamma pattattarnera nalunngilaat.
- Uummalloqaanga. Kitaari aamma nipilersorneq inuuninnut nuannaarutaasorujussuuvoq, nipilersortarninnillu ilaquttakka pilersorpakka.
Simon Lynge marlunngorpat tulliani assamigut annertuumik suliaritissaaq. Tamatuma kingorna piffissami sivisuumi sungiusassalluni. Taassuma arlaatigut kitaareqqissinnaalernissani neriuutigaa.
- Tupinnartuliortoqarnissaa upperalugu aalajangerpunga.
Suliaritinnissaa nammineerluni sillimmataanit matussuserneqarpoq. Kisianni pingaarutilimmik peqqissarluni sungiusarnissaa akisusinnaavoq. Piffissami tassani sivisuumi aamma isertitaqarnavianngilaq.
- Janna maanna immikkut ikiorlunga meeqqat isumagalugit illuleralunilu nammataqartussanngorpoq.
- Ikiuinissigut ilaquttakka qaammatini tulliuttuni peqqissarninni kivinneqassapput, aammalu sungiusarninnut aningaasartuutinut tapiissutaallutik, pilattaasussamalu assama peqqisseqqinnissaanut tamanna assorsuaq pingaartinnerarpaa.
Katersuiniarnermut linki Facebookimi allataani nassaarineqarsinnaavoq.