isumaliutersuut
Simon Lynge: – Nunarsuarmut tunniussassaqaqaagut
Nunagisamit ungasissumi najugaqarluni Kalaallit Nunaata naleqassusai ilaanneeriarluni allaanerusumik takuneqarsinnaasarput, erinarsortartoq Simon Lynge oqarpoq, taassumalu kalaalit tarningat nalissaqanngitsutut taavaa.
Immaqa Simon Lyngep ulapittuulluni inuussutissarsiutigalugu inuuneranut takussutissatut sapaatit akunnialuinik juullip siornatigut Københavnimi akunnittarfiup silarlersuani naapippugut. Aallaqqaammut nunagisamit ungasissumi juullisiortarneq eqqartulerparput; oqaloqatigiinnerpulli sukasuumik isumaliutersornermut sanguvoq.
Nassuiaavoq ungasissumi najugaqarnini pissutigalugu Kalaallit Nunaat allaanerulaartumik isigilersimallugu.
– Uannit isigalugu Kalaallit Nunaat nalissaqanngilluinnarpoq. Kalaallit Nunaat periarfissaqarpoq nunarsuup sinneranut maligassiuisuunissaminut, Simon Lynge oqarpoq.
Kalaallit tarningat
Taanna isumaqarpoq maluginiarneqartariaqartoq nunami ineriartornermik pilersitsiniarnermi immikkuussutaallluinnartut ilaat annaaneqarnavianngitsut.
– Isumaqarpungda Kalaallit Nunaanni aamma inuit tarningi nalissaqanngilluinnartuusut.
– Itisuujupput kissalaartuullutillu, inuppalaartumillu pissuseqarput pissutigalugu inuuniarneq sakkortoqimmat. Tamarmillu nalunngilaat inuuniarneq sakkortuujusoq. Tamanna pissutigalugu inuit imminnut akaareqatigiinnerupput.
– Arlaat erloqinarluinnartumik misigisaqarsimappat aliasoqatigiinnissaq ajunngilaq. Ajunngilaq inimeeqatigiilluni aliasoqatigiinnissaq akunnerpassuarnilu qiaqatigiinnissaq. Tamanna tunissutaavoq. Qanilaassuseq tassaniittoq attatiinnassavarput.
Nakkaakkiartorneq
Simon Lynge nassuiaavoq paasisinnaalluarllugu inuiaqatigiinni ineriartornermik pilersitsiniartoqarmat, minnerunngitsumik suliffissaaleqisunut, allaammi inissaqanngitsunut. Isumaqaannarporli kitaamiut inooriaasiat pinngitsoorani malinniarneqartariaqanngitsoq.
– Takusinnaasakka malillugit maannakkorpiaq nunani killermiut tamarmik sukkasuumik ajutoorfissamut ingerlarsorput. Nunarsuarpummi manna killeqanngitsunik pisuussuteqanngilaq.
– Pisuussutit nunamiinngillat
Simon Lyngep takusinnaalluarpaa aningaasat uranisiornermit, uuliasiornermut assigisaannillu pissarsiat inuiaqatigiinnut iluaqutaasumik ineriartornermik sukkasuumik pilersitsisinnaasut. Isumaqarporli piffissaq ungasinnerusoq isigalugu akisunaarneqarsinnaavoq, isumatusaanngikkaanni.
– Kalaallit Nunaanni nalillit nunamiinngillat, qaqqat iluiniinngillat, inunniipput.
Nalunngikkaluarlugulu taamatut oqarnermigut aningaasat suminngaanniit pissarsiarineqassanersut akissutissaqartinnagu eqqarsarluaqquseqquvoq.
– Kalaallit tarningisa qanoq nalissaqanngitsiginerat akueriniarlugu nukissaq nassaariniaannartariaqarpoq. Ilami nunarsuarmut tunissaqaraluaqaagut.