silarluk
Silarluup timmisartut kinguaattoortippai
Ataasinngornermi ullaap tungaa Nuup mittarfianiit aallartoqaranilu suli tikittoqanngilaq silap ajornera pissutigalugu
Sinerissap ilarujussua silarluppoq. Timmisartut angallannerannik tamanna eqquivoq ullup ingerlanerani kinguaattoortoqaalunnissaa ilimagineqarluni.
- Nuummi silap ajornera pissutigalugu ajuusaarutigalugu nalunaarutigissavarput Nuummiit Nuummullu timmisartuussinerit tamarmik kinguaattuussammata, Air Greenland nalunaarpoq.
Norsaq utaqqivoq
Air Greenlandip timmisartorsua Norsaq Kangerlussuarmut tikereerpoq, sulili nalunarpoq qaqugu Københavnimut uteriarumaarnersoq. Nuup Kangersuullu akornanni timmisartuussineq ataasinngornermi ullaap tungaa uninngavoq.
- Silap qanoq innera apeqqutaalluni suli nalunarallarpoq Nuummiit ilaasut qaqugu aallarumaarnersut aammalu atlantiku qulaallugu timmisartuussineq GL 782 Kangerlussuarmiit Danmarkimut qaqugu aallarumaarnersoq, Air Greenland nalunaarpoq.
Ilaasut eqqorneqartut Air Greenlandimit toqqaannartumik nalunaarfigineqarput.
Ataasinngornermi ualinerani qatsuuminissaa silasiortut ilimagaat.