Sila
Silarlunnerani timmisartumik angallanneq eqqorneqarpoq
Aasaanerani silap nalinginnaanngitsumik silarlunnera, pingasunngornerup unnuaani illoqarfiit pingaarnersaanni annertuumik ajornartorsiortitsinngilaq. Taamaattorli timmisartukkut angallassineq annertuumik eqqugaavoq.
Ukiup imaalinerani anoraasuarnerit taama sakkortutigisunut attuumassuteqartunik nalunaaruteqarfigineqarsimanatik, Nuummi politiit ilisimatitsipput.
Air Greenland eqqugaasoq
Kisiannili sila Air Greenlandimut ajornartortitsivoq, pingasunngornerup ingerlanerani timmisartuussinissarpassuarnik kinguartitsisariaqarsimalluni. Timmisartorsuaq Airbus, Kangerlussuarmiit nal. 11.40 aallarnissamut pilersaaruteqaraluartoq, aatsaat nal. 21.05 aallarnissaa naatsorsuutigineqarpoq, timmisartortitseqatigiiffiup nittartagaani tamanna atuarneqarsinnaavoq.
Anori sakkortooq ualip ingerlanerani sakkukilliartussaaq, DMI silamut ilimasaarutiminni kingullermi ilisimatitsivoq, Nuup eqqaalu pillugu ima allappoq:
- Ullup aallartinnerani nuialluni siallissaaq, kujasik aamma kujasik kangisimmik anorsarilluni natsimaninnguuttartumik, tamatigut tamaana anorersuartut sakkortussusilimmik anoraasuartassaaq. Ulloqeqqata-tungaanit ualimut anori kujasik kippasimmut saakkiartussaaq. Ilutigisaanik sumiiffinni amerlasuuni erseqqarississartussaaq seqinnilertarlunilu. Arfinillit qulillu akornanni kiassaaq, Nunatta Kitaa pillugu taama nalunaaruteqartoqarpoq.
Aamma atuaruk: Kalaallit Nunaat tamakkerlugu silassamut ilimasaarut