Uumasut
Silap pissusiata allanngoriartornera tuttut inuunerinik ulorianartorsiortitsivoq
Sverigep avannaani tuttuutilinnut siunnersuutitsialaat akisupput. Tuttut ukiuunerani kiannerulersumi uumaniarsaralutik assoroorput. Svalbardimi Ruslandimilu uumasut aamma naalliupput.
Sverigemi Kirunami ukiuunerani ullumi ullukinnerpaaffianiippoq. Ukiuunerani issersuaq ulussani malunnartussaagaluarpoq. Kisianni taamaanngilaq. Kisianni sila isseqaranilu oqquarpoq.
Tassani avannaani tuttut issinnerani eqqissillutik katersuuttaraluarput. Kisianni kianneranik atugaat allanngorput, tamannalu ajornartorsiortitsivoq.
Kiappallaartoq
20-t 30-llu missaanni issittussaagaluarpoq, Niila Ingas, saameqarfimmi Laevasimeersoq tuttuutilik oqaluttuarpoq.
- Juullikkut nalaanni kiannerulaalertaraluarpoq. Kisianni imannaanngitsoq, taassuma tusagassiorfik Dagens Nyheter oqaluttuarfigaa.
Niila Ingasip ilaqutai kinguaariinni arlalinni Kirunami tuttuuteqarluni inuuneq pillugu ilisimasanik immikkuullarissunik katersaqarput. Kisianni silap pissusiata allanngoriartornerata inuussutaat sunnerpaa.
- Tuttut pillugit paasinngisaqaruma siornatigut ataatannut sianertuaannarsinnaaimavunga. Kisianni maanna taamaatillugu siunnersorsinnaanngilaanga, Niila Ingas oqarpoq.
Ukiuni kingullerni sumiiffimmi tassani silaannaq kissakkiartulersimavoq, Sverigep silasiorfianit SMHI-mit kisitsisit tamanna takutippaat.
1960-ikkunni agguaqatigiisillugu minus 0.18 gradinik issittaraluarpoq. Ukiut 40-t qaangiuttut 2001-mit 2010-mut plus 1.16 gradinut qaffassimavoq.
Atuaruk: Gasit kissatsitsisartut nunamit qeriuaannartumit aniapput
Tamanna ississorinarpoq, kisianni tuttunut kiappoq. Nalornilersarput paatsiveerusimaalersarlutillu. Siornatigut ataatsimoorlutik nerisararluarput, kisianni kiannerani sumiiffinni annertunerusuni siammartilersarput.
Tamanna nukissamik aamma nerisassamik annermik pisariaqartitsilertarpoq. Ajornerpaagaangami arnavissat katatsinerannik kinguneqarsinnaasarpoq.
Ruslandimi toqorartorpassuit
Svenskit tuttuutaat kisimik kiatsinnerani ajornartorsiunngillat. Norgep avannaani qeqertami Svalbardimi tuttut tuatsikkaluttuinnarput.
Tassani tuttup agguaqatigiisillugu 1990-mit oqimaassusaa 55 kiilumit 48-mut apparsimavoq, nutaarsiassaqartitsivik AFP allappoq.
Aammattaaq tuttut Ruslandip avannaani Siberiami silap pissusiata allanngorneranik toqorartorpassuupput.
Aput nunamut tukkiartornermini sialunnguuttarnera, uumasut toqorarnerannut pissutaavoq. Aput aatsinnagu imeq nunap qaani qerisarpoq, sermimillu nuna assertarlugu. Tamatuma uumasut nerisinnaajunnaarsittarpai.
Tamanna 2006-imi aamma 2013-imi pivoq, taamatullu ingerlaannartoqassappat ukiuni hunnorujulikkani Siberiami tuttuuteqartarneq taamaatissinnaavoq, AFP allappoq.