Silap pissusiata allanngoriartornera qanoq iliuuseqarfigineqartariaqarpoq

FN-ip silap pissusianut panel-iata nunarsuup qanoq issusaanik nalunaarusiani nutaaq ullumi saqqummiuppaa.
Pingaartumik Issittumi ajorluinnarpoq, tamaani nunami imaanilu sermeq aakkiartormat, imarlu kissatsikkiartorluni.
Taamaasilluni ilisimatuut ilaaas tikkuarpaat ukiut 1000-t qaangiuppata sermersuaq nungulluinnarsimassasoq, aasaaneranilu immap sikuata annertussusaa ukiut qulikkaat ikittut qaangiuppata 1980-imi annertussusaanut sanilliullugu qulararterutaannanngortassaaq.
Ilimanarluinnarpoq Issittoq allanngorluinnassasoq, WWF Verdensnaturfonden-imeersoq silap pissusianut pisortaq John Nordbo oqarpoq.
Tamannalu ernumanartoqarpoq:
– Tunngaviatigummi ilisimanngilarput Issittumi allanngornerujussuit qanoq kinguneqassanersut. Qularnanngilluinnarporli tamanna aalisarnermut annertuumik sunniisinnaasoq aammalu uumasoqatigiippassuarnut immap sikuanik isumalluutilinnut, ilaatigut puisinut nannunullu annertuumik sunniuteqarsinnaasoq, John Nordbo Sermitsiaq.AG-mut oqarpoq.
– Taamaattumik nakkutilliinissamut tunngavissaqarpoq tamatigullu eqeersimaarluni qulakkeerniarlugu Kalaallit Nunaat suli inuussutissaqassasoq, silap pissusiata allanngoriartornera annertusiartortillugu.
Atuaruk: Kalaallit Nunaat aakkiartorpoq - ajorsiartuinnassaarlu"
Atuaruk: Sermersuup aakkiartornera ´atuagaq sualuttoq´
Nukissiorfiit inaallagissamik tunisassiornerat nersualaarpaa
Assersuutigalugu pinngortitap atorneqarnera eqqarsaatigeqqinneqarsinnaavoq, NGO oqarpoq.
WWFR Verdensnaturfonden aasaq Nunavummi Iqalunni sammisaqartitsivoq, tamatumani suilniunni ´Sermeq kingulleq´ ilaatigut Inatsisartunut ilaasortanut arlalinnut saqqummiullugu.
Suliniummi tamatumani Qaanaap imartaa, Kalaallit Nunaata avannaa Nunavullu avannarlersaa sammineqarput, naatsorsuutigineqarmat tamaani immap sikua siunissami aamma aasakkut atasinnaasassasoq.
– Taamaattumik tamanna pingaaruteqarpoq, tassa tamatumuuna qulakkeerneqarsinnaammat pingartutut kulturip, kalaallit dna-visa ilaat issuttumilu uumasut immikkut illuinnartut uumaniarfiisa attatiinnarneqarnissaat, John Nordbo oqarpoq.
Kalaallilli Nunaata isumalluutissaraa nunarsuup sinnerata mingutsitsinikinnerulernissaa, silap pissusiata allanngoriartornera unitsinniarlugu.
Taamaattumik John Nordbop Nukissiorfiit innaallagissamik tunisassiornerat nersualaarpaa, maanna pingaartumik nukissamik ataavartumik erngup nukinganik tunngavilik, nunarsuup kissatsikkiartorneranik killileeqataammat.
– Nunarsuup sinnerani pisortat nukissiornerisa 70 procentiat erngup nukinganik tunngaveqalersuuppat angusaqassaqaagut, Kalaallillu Nunaat maligassiuisuussaaq, John Nordbo oqarpoq.