Silap pissusia pillugu ataatsimeersuarnissamut nunat 53-it isumalluartitsilerput

Nunat Commonwealthimut ilaasortat 50-t sinneqartut, katillutik 1,8 milliardinik inullit, silap pissusia pillugu nutaamik isumaqatigiissuteqarnerisigut qularnannginnerulerpoq Parisimi silap pissusia pillugu ataatsimeersuarnermi piviusunik angusaqartoqarumaartoq.

Taamatut nunat kattuffimmut ilaasortaasut 53-it nalunaarumminni erseqqissaapput, tassungalu ilaasortat tassaanerupput Tuluit Nunaat taassumalu nunasiaatigisimasai.

Ernumanartoqaqisoq

– Taama immitsinnut qanillattortigisimagatta silallu pissusiata allanngoriartornera pillugu nalunaarummi samminnittorujussuarmi isumaqatigiilluinnangajassimagatta, Parisimi COP21-mi ataatsimeersuarnermi iluatsitsilluarnissaq ilimanarnerulerpoq, Maltap premierministeria Joseph Muscat, sapaatip akunnerata naanerani Commonwealthimut ilaasortat ataatsimeersuarneranni ataatsimeersuartitsisoq, oqarpoq.

Nunat taakkua 53-it ´ernumanartoqartittorujussuuvaat´ nunarsuup kissatsikkiartuinnarneratigut nunat assigiinngitsorujussuarmik ulorianartorsiortinneqarnerat - assigiissuteqanngitsumik.

Aningaasaateqarfik

Nunat Commonwealthimut ilaasortat ataatsimeersuarnerminni akuersissutigaat silap pissusianut aningaasaateqarfimmik pilersitsiniarlutik, tassuuna nunat mikinerit silap pissusiata allanngoriartornerata kinguneqaataanik pitsaanerusumik akiuiniarnerannik ikiorneqassallutik.

– Silap pissusiata allanngoriartornerata ataatsimuulersippaatigut. Tamavitta umiariamiilersippaatigut. Malerujussuup umiariaq eqqorpagu tamatta igeriussaassaagut, Naurup præsidentia Baron Waqa oqarpoq.

– Annannissaq toqunissarluunniit pineqarput, taanna erseqqissaavoq.

Pituttorsimasumik isumaqatigiissut

Nunat Commonwealthimut ilaasortaasut, nunarsuup inuisa 1/3-liinik inullit, neriorsoqatigiipput Parisimi silap pissusia pillugu ataatsimeersuarnermi, ataasinngorpat aallartinneqartussami, ataatsimoorlutik piumasariniarlugu ´anguniagalimmik´ ´inatsisitigullu pituttorsimasumik´ isumaqatigiissuteqartoqarnissaa.

Nunalli Commonwealthimut ilaasortat ilaat nangaassuteqarput, oqaatigineqanngilarli naalagaaffiit tamakkua kikkuunersut.

Commonwealth 1931-imi Traktaten fra Westminster-ikkut pilersinneqarmat nunat ilaasortat siulliit tallimat tassaapput Tuluit Nunaat, Canada, Australia, New Zealand Sydafrikalu. Nunanit ilaasortaasunit naalakkersuisut siulittaasui ukioq allortarlugu ataatsimiittarput.

Nunat Commonwealthimut ilaasortat amerlanerpaat tassaapput nunat siuarsagassat.